– Må kunna fylla i dei største hola

Som ofte før vart det ein vegdebatt i kommunestyret på torsdag. Då slo Knut Førland fast at vegstandarden er ei utfordring, også for næringslivet og pendlarane. Sjølv reiser han tur/retur Rosendal-Stord kvar dag, og passerer såleis gjennom eit av områda med dårleg veg.

– Hola i Herøysundet blir større og større. Sjølv om ein køyrer i 1 kilometer i timen er det faktisk problem med å passera. Eg har ringt til Statens vegvesen nesten kvar dag og sagt at dei må gjera noko. Men no har dei byrja å leggja på når eg ringer, så eg trur ikkje eg kjem lenger, sa han.

Førland bad derfor kommunen leggja press på vegvesenet.

– Dei må i alle fall kunna gjera det heilt nødvendigaste og fylla i dei største hola. Det er ikkje nokon stor jobb, og burde vore ein sjølvfølge, vurderte MDG-politikaren.

Til Grenda opplyser Førland at han også ringte Vegvesenet på fredag, og faktisk fekk svar. Han fekk også takk for at han gav beskjed om problemet.