- Må ikkje skusle vekk den naturgitte ressursen som energi er!

Arrangøren, LO i Sunnhordland, håpar flest mogleg vil vera med å vise kva dei tykkjer om dei høge straumprisane, og oppmodar særleg lokale og sentrale politikarar til å ta turen.

«Fagrørsla og ei rad lokale organisasjonar og verksemder har skipa folkeaksjon mot høge straumprisar i Sunnhordland. Dette med sikte på å få på plass varig tryggleik mot dei ekstreme straumprisane me opplever i desse dagar. Dette inneber at me krev at styresmaktene tek politisk kontroll over straumprisane», melder dei på Facebook, under parolen «Krafta er vår!»

– Me må innføra makspris for vanleg forbruk og regulera eksporten mykje strengare – det må verta slutt på import av europeiske straumprisar! skriv dei vidare.

Krev betre styring

Det blir både appellar og kulturelle innslag i løpet av demonstrasjonen. Mellom anna vil Ørjan Normann, hovudtillitsvalt ved Hydro Husnes, halda ein kort appell.

– Det er naturressursane vi alltid har levd av her i dette landet, og med denne demonstrasjonen blir det gitt klar beskjed om at vi krev betre styring av våre naturgitte ressursar frå våre framste tillitsvalte, seier Normann, før han understrekar at politikarane ikkje må skusle dette vekk.

Med «vi» meinar han medlemsmassen i dei lokale fagforeiningane.

Normann har vore med i arbeidet mot utanlandskablar sidan tidleg på 2000-talet. Den gongen var det ikkje mange som stilte seg bak åtvaringane, men no står dei ikkje lenger åleine.

– Men så store svingingar som det vi ser no, såg sjølv ikkje dei mest pessimistiske av oss føre seg. Grøn omstilling må vi ha, og vi må stå saman som nasjon, både når det gjeld on- og offshore industri, samt det private og offentlege. Vi må ha framsynte politikarar som tek kontroll over krafta, og som lagar rammevilkår til det beste for industrien og for folket, held han fram.

Hovudappellen under demonstrasjonen på Leirvik vert haldt ved Atle Tranøy frå Fellesforbundet Hardanger Sunnhordland og Industriaksjonen, medan Hans Martin Haavik (Amfi Stord), Anne M. Madtsen (Utdanningsforbundet), Kjell H. Belsvik (Stord Idrettsråd) og Monica B. Fosse (Fagforbundet og Tilskiparane) skal, til liks med Normann, halda korte appellar.

D'AccorD og Endre Olsen står for underhaldninga.

Nasjonal merksemd

Aksjonen på Leirvik er ein av mange som vil gå føre seg. Det vil nemleg vera 21 demonstrasjonar over heile landet denne dagen. I tillegg til den på Stord, blir det også halde ein liknande demonstrasjon i Odda.

Demonstrasjonane blir organiserte av ei rekkje fagforeiningar som saman har starta Industriaksjonen. Industriaksjonen meiner at det er ein føreseieleg kraftpolitikk som vil gagna fellesskapet.

«Industriaksjonen tar saman med fagforeiningar i industrien og LO sine lokalorganisasjonar initiativet til ein brei allianse som krev store kutt i straumprisane. Det har politisk kontroll over kraftbransjen som føresetnad. Vasskrafta er arvesølvet som skal tene folk flest og fortsetja å vere eit konkurransefortrinn for industri og næringsliv.» heiter det mellom anna i Industriaksjonen sin flyer «Vannkrafta er vår».

Blant organisasjonane som har gjeve si støtte til demonstrasjonen på Leirvik finn ein mellom anna Utdanningsforbundet Kvinnherad, Fagforbundet Kvinnherad, LO i Sunnhordland og ei lang rekkje andre.