– Må ikkje la dette gå frå oss

Det er usikkert kor mykje tunnelmasse frå Kroka som vil bli nytta til vegutbetring. Det er også høgst usikkert kor mykje «gul stripe» det vert mellom Mauranger og Årsnes.

I forvaltningsutvalet spurde Øyvind Hardeland (Ap) om status for arbeidet med vegutbetring mellom Mauranger og Årsnes.

– Reguleringsplanen for tunnelen på Kroka vert truleg snart vedteken, og det vert jobba parallelt med å få til punktvis utbetring på heile strekninga. Det manglar nyare reguleringsplanar på strekninga, og administrasjonen ser no på kva moglegheiter det er for å ta noko av utbetringa på dispensasjon, opplyste avdelingsleiar Natalie Sæberg.

Ho la til at for nokre utbetringar, særleg der det må fyllast i sjø, vil det truleg bli sett krav om reguleringsplan.

– Det er dialog med fylkeskommunen og Fylkesmannen om kva prosessar som må til ved dei ulike tiltaka på heile strekninga. Leiinga i Kvinnheradpakken og entreprenøren Vassbakk og Stol deltek i dette arbeidet, der målet er «mest mogleg betre veg på strekninga», sa Sæberg.

 

Alle klutar

Hardeland var ikkje direkte begeistra for svaret, og tenkte spesielt på at massane frå Krokatunnelen må verta nytta til noko fornuftig.

– Det var dette eg frykta. Vi må ikkje koma dit at vi kastar stein på sjøen. Det finst mange kilometer med veg som kan vølast. Her må alle klutar setjast inn slik at vi får nytta massane. Dette må ha høgste prioritet, oppmoda han.

Guttorm Røssland (H) undra om «mest mogleg betre veg» betyr møtelommer eller breiare veg med gul stripe.

– Det er nok ikkje mogleg å laga gul stripe heile vegen. Skal vi ha gul stripe, så er det ikkje noko spørsmål – då må vi ha reguleringsplan for heile strekninga. Nokre stader vert det kanskje brei nok veg til å ha gul stripe nokre meter, medan vi andre stader må finna andre løysingar, svarte avdelingsleiar Kjartan Thoresen.