Lukka møtet i 1 time for å diskutera kvikkleire

Kvikkleireproblematikken og Toftetunet sine byggjeplanar førde til at torsdagens formannskapsmøte vart lukka i nærare éin time. Etterpå vart det bestemt å kartleggja faren for kvikkleireskred i Kvinnherad.

På saklista til formannskapet var det oppført to saker som var relatert til kvikkleire. Men før ein kom til sakshandsaminga, ville administrasjonen halda ei orientering. Det ynska dei at skulle skje bak lukka dører.

– Frå ein aktør har vi fått ein henvendelse som berører denne saka, sa kommunedirektør Ragnhild Bjerkvik, og bad om at desse opplysningane vart unnateke offentlegheit i denne omgang.

– Fordi det kan svekka kommunen sin forhandlingsposisjon, grunngav ho.

Det vart samrøystes vedteke å lukka møtet, sjølv om Ove Lemicka (Frp) var noko skeptisk.

– Vi bør så langt som mogleg ha opne møte, det er grunnhaldninga mi. Det bør vera heilt spesielle årsaker for å lukka, understreka han.

Aktsemdskart

Lukkinga varte og rakk, og fyrst etter nærare éin time slapp lokalpressa inn i møterommet på kulturskulesenteret igjen. Den fyrste saka, som omhandla kartlegging av kvikkleire i Kvinnherad, vart raskt klubba samrøystes igjennom. Vedtaket der er formulert i tre punkt:

1. Kommunedirektøren vert beden om å gjennomføra ei kartlegging av mogleg fare for kvikkleireskred med mål om å få aktsemdskart for størst mogleg del av Kvinnherad.

2. Det skal gjennomførast eit forprosjekt for å skildra tilfredsstillande områdestabilitet for noverande og framtidig busetjing i faresoneområda på Tofte. Forprosjektet skal visa kva tiltak som må gjerast i dei ulike delane av området.

3. Tiltaka vert kosta innafor ei ramme på 3 millionar kroner i åra 2022 og 2023.

Friskmeldast

Den andre saka gjaldt Statsforvaltaren i Vestland sin klage etter at forvaltningsutvalet i august gav Toftetunet AS dispensasjon frå byggje- og deleforbodet på Tofte. Selskapet ynskjer som kjent å byggja bustader i gamle Tofte skule. I kommunedirektøren si innstilling vart det rådd til å ta klagen til følgje, og såleis ikkje gje dispensasjon.

– Det er ikkje tvil om at kommunen er involvert i saka, og det kviler eit tungt ansvar på kommunen å finna ei løysing, innleia Ove Lemicka (Frp).

Han presenterte eit forslag der det mellom anna heiter at «Kvinnherad kommune vil påta seg ansvar for gjennomføring av naudsynte målingar og eventuelle sikringstiltak saman med eigaren av Tofte skule».

Leif Sverre Enes (H) ynska ei tydeleggjering av tidsaspekt og kostnadsfordeling.

– Vi må undersøkja om området kan friskmeldast. Kan det ikkje det, så må ein gjera tiltak. Då må ein diskutera fordeling av kostnader med Toftetunet. Arbeidet må skje no, utdjupa Lemicka.

Sektorleiar Anbjørn Høivik tykte forslaget høyrdest «litt skummelt ut», og grunngav det med at kommunen då mogleg bevega seg inn på noko som er tiltakshavar sitt ansvar.

– Det må bli meir tydeleg kva ansvar vi tek på oss og kva vi ikkje tek på oss, støtta Hilde Enstad.

Skunda oss langsamt

Ho la dermed fram eit nytt forslag, som mellom anna lyder: «Det skal straks gjennomførast eit forprosjekt for å skildra tilfredsstillande områdestabilitet for noverande og framtidig busetjing i faresoneområdet på Tofte. Forprosjektet skal visa kva tiltak som må gjerast i dei ulike delane av området. Området rundt Toftetunet skal ha fyrsteprioritet».

– Forslaga er ganske like, men ordføraren sitt adresserer inga straksløysing for Toftetunet, meinte Lemicka.

– Ordføraren sitt forslag seier at vi skal skunda oss langsamt. Eg opplever at alle synest det er ei vanskeleg sak, men at vi ynskjer å imøtekoma utbyggjar, kontra Enstad.

Hennar forslag vart vedteke med åtte mot éi røyst.