Lovar god Helgheim-stemning på søndag
Uskedal Historielag lanserer den tredje boka i serien «Den nære fortida» med ein fest i Helgheim førstkomande søndag. Der blir det musikk, mat, samt nye og gamle bøker.
Arbeidet med, og innhaldet i boka skal presenterast i eit «bokbad» - ein samtale mellom Kristian Bringedal og dei som sit i skriftstyret. Historielaget lovar også at ei eksklusiv songgruppe som sjeldan opptrer, skal ha eit innslag der originalane i Uskedalen vert presentert.
I tillegg vert det musikk frå både Uskedalen Musikklag og To rustne menn, og arrangørane lovar lappar, kaffi og saft. Det vil sjølvsagt også bli høve til å kjøpa bøker, og henta førehandsbestilte eksemplar av den nye boka.
Annonse
Spanande artiklar og bilete
– Skriftstyret er veldig nøgde med den nye boka. Den har fleire sider enn dei to første, og bilet-utvalet er svært interessant, skriv dei i ei pressemelding.
Det er mange bidragsytarar til boka, der ulike artikkelforfattarar har skrive om ulike tema. Boka har mellom anna historier om overnattings- og serveringsstader, om livet på Skorpo og Haktorstunet, om strandstafetten og om karane som skulle byggja veg frå Øvre Musland til Matre med berre handemakt og hest.
Uskedal Historielag lovar god Helgheim-stemning på søndag, og ynskjer alle velkomen.
