Lothepus greip inn - har endeleg fått løna dei var lova
Etter mykje mas og planar om inkassokrav, har endeleg ei russegruppe ved KVV fått betaling for arbeidet dei gjorde under Sus&Dus-festivalen i Odda i sommar.
Festivalarrangøren Sabla Moro hadde stort behov for frivillighjelp under festivalen, og skreiv kontrakt med russegruppa frå Kvinnherad. Dei som var over 18 år, skulle få 180 kroner i timen, medan 17-åringane skulle få 145 kroner, og pengane skulle koma på konto seinast i oktober.
– Pengane skulle me bruka på utgifter med russe-utstyr, samt sleppfest der me lanserer gruppa sitt namn og russelåt, fortel Tristan Thorsen.
Annonse
«Lovpålagt ferie»
Det var han og kompisen Mathias Veastad som hadde kontakt med Sabla Moro, på vegner av heile russegruppa. 13-14 russ stilte opp på festivalen, og alle jobba i omtrent 13 timars økter i 3-4 dagar, både med scene-rigging, kiosksal og vakthald.
– I oktober fekk me epost om at det ikkje kom til å vera mogleg med utbetaling på ubestemt tid, fordi dei hadde tatt ut lovpålagt ferie, og nokon hadde blitt sjuke, fortel Tristan Thorsen.
Sabla Moro kunne altså ikkje opplysa ungdomane om kor tid løna skulle koma, eller om pengane i det heile kom til å dukka opp. Tristan og gjengen prøvde å finna ut av situasjonen, utan hell.
Annonse
– Til og med då me sende eit formelt krav, som ville gå til inkasso innan eit par veker, fekk me berre same svar om at utbetalinga var utsett på ubestemt tid.
Lothepus greip inn
Leif Einar «Lothepus» Lothe var frontfigur for Sus&Dus-festivalen. Sjølv om han ikkje var arrangør eller ansvarleg for det økonomiske rotet, tok det til å koma ubehagelege spørsmål til han direkte frå mellom anna Dagbladet og TV2. Det førte til at han greip inn.
– Rett før me skulle senda kravet vårt til inkasso, høyrte me at no var det forhandlingar mellom Lothepus og arrangøren, så då avventa me litt. Så fekk me vita at pengane skulle koma den 16. desember, og no har me nett fått pengar på konto. Litt, i alle fall.
Thorsen er nemleg ikkje heilt sikker på om det er rett sum dei har fått.
– Me hadde rekna oss fram til at me skulle hatt nærmare 100 000 kroner frå Sabla Moro, og no har me fått 70 000. Så me må nett rekna på det ein gong til. Men 70 000 er no i alle fall betre enn 0, smiler han over telefonen.
Annonse
Ein bra fyr
Det er ikkje berre Tristan og russegruppa hans som har hatt trøbbel med det Sørlands-baserte arrangør-selskapet. NRK skriv at det er 400 personar som har måtta venta på løna si etter Sus&Dus. Lothepus sitt holdingselskap kjøpte til slutt opp selskapet, så han kunne betala ut all løna med sine eigne midlar.
– Eg trur ikkje det var berre for å redda namnet sitt. Han verkar som ein bra fyr, og det verka som at han ikkje har samvit til at folk går og ikkje får betalt, seier Tristan Thorsen.
No kan russegruppa sjå fram til sleppfest og resten av russetida si.
