Lokkar med rekrutteringsbonus
Som kjent slit mange bransjar med å få tak i nok folk. Det gjeld også fleire reiarlag, deriblant Fjord1. No prøver selskapet nye verkemiddel.
Publisert
– Er rekrutteringsbonus nøkkelen til suksess?
Det spør Fjord1 på Facebook-sida si. Samstundes vert det opplyst at sjøtilsette i Fjord1 no får heile 15.000 kroner i bonus for å rekruttera nye faste tilsette.
Annonse
«Rekruttering er ei av dei største utfordringane i den maritime næringa. For å møta denne utfordringa, har vi auka rekrutteringsbonusen for sjøtilsette og lærlingar som hjelper oss med å finne nye kollegaer til sjøs», står det.
HR-rådgjevar Regine Midtbø Gausemel håpar bonusen vil motivera fleire til å bidra.
– Vi ønskjer å motivera våre tilsette til å vera aktive ambassadørar for Fjord1. Ved å auka bonusen håpar vi å tiltrekkja oss fleire dyktige sjøfolk til faste stillingar eller langtidsvikariat. Dette er ei fantastisk moglegheit for våre sjøtilsette til å bidra til vekst og utvikling i selskapet, samtidig som dei sjølv kan få ein solid bonus, er ho sitert på.
Det var Hardanger Folkeblad som fyrst skreiv om ordninga.
