Lokalt distribusjonsselskap: – Vi har alle papir og kontraktar i orden
Det har vore mykje negativ merksemd kring avisdistribusjon etter storkontrollen i Bergen. Men Kvinnherad-selskapet Mercury logistikk AS understrekar at dei har alt på stell.
Publisert
Som Grenda skreiv på tysdag, føretok A-krimsenteret Vestland nyleg inspeksjon av Schibsted Distribusjon Vest (SDV) sin terminal i Bergen. Resultatet var svært nedslåande, for det vart avdekka både arbeidslivskriminalitet og svart arbeid hjå fleire kontraktbaserte underleverandørar. I ei pressemelding skreiv SDV at funna er uakseptable, og lova å rydda opp sporenstreks.
SDV har ansvaret for distribusjonen av både Grenda og Kvinnheringen i store deler av Kvinnherad. Ein av deira lokale underleverandørar er selskapet Mercury logistikk AS. Dei høyrer heime på Sandvoll, og blir drive av ekteparet Ann Helen og James Collins. Duoen har lese artikkelen om storkontrollen i Bergen, og ynskjer å koma med nokre presiseringar.
Annonse
Jobbar hardt
– Det er utført inspeksjon av oss som har ansvaret for distribusjon av aviser i Kvinnherad, og det vart ikkje funne nokon feil eller manglar hjå oss. Vi har alle papir og kontraktar i orden. Vi har blitt informert om at det har vore ein del avvik i Bergensområdet, men her i kommunen jobbar vi veldig hardt for å gje ein god service og følgja alle arbeidsmiljø- og vegtrafikkreglar, opplyser dagleg leiar Ann Helen Collins.
– Vi føler at artikkelen kan virka litt misvisande, då det kan tolkast som at det føregår arbeidskriminalitet hjå oss. Vi ynskjer ikkje at folk får eit intrykk av at vi er kriminelle, legg ho til.
