Lokale deltakarar i «Jubileumsveka på Moster»

Frå det store utvalet arrangement, kan vi trekkja fram at onsdag 29. mai går verdiseminaret «Verdiar i lokaldemokratiet» av stabelen.

«Verdiseminaret har som mål å identifisera aktuelle utfordringar i lokaldemokratiet og peika på verdiar som kan hjelpa oss til å ta vare på og vidareutvikla lokaldemokratiet», står det i programmet.

Til kommunestyret fortalde ordførar Vegard Bjørnevik at han skal ta turen, og oppmoda også andre til å verta med.

Olav den heilage

Komande fredag er det klart for eit nytt seminar, no med tittelen «Verdiar i vår kulturarv». Deltakarar er Jørn Øyrehagen Sunde og Eivor Oftestad, medan prosten i Sunnhordland, Svein Arne Theodorsen, skal leia ordskiftet.

På laurdag skal professor Jørn Øyrehagen Sunde i elden igjen. Då opptrer han i Moster gamle kyrkje med føredraget «Olav Haraldsson som politikar og kristninga som politikk».

«Det som vart heitande kristenretten på Moster frå 1024 var ei samling reglar om organisering av kyrkja og korleis ein kristen skulle leva. Samlinga vart tilskrivne Olav den heilage, men under dei enkle organisatoriske reglane og levereglane, låg det ein heilt ny samfunnsorden, og eit nytt verds­ og individsyn. Kristenretten på Moster må derfor sjåast på som eit forsøk på ei storstilt samfunnsreform», står det om temaet.

Seinare same dag kjem også kronprinsparet på besøk til Moster.

Radio og tv

Søndag 2. juni skal jubileumsveka avsluttast med ein drøss nye programpostar. Mellom anna vert det storstila gudsteneste i Moster Amfi, som vert direktesendt på NRK radio og tv. På ettermiddagen kan folk få med seg «Oppsummering av Moster 2024», som byr på ein paneldebatt leia av Jørn Øyrehagen Sunde. Deltakarar er statsråd Kjersti Toppe, biskop Ragnhild Jepsen, forfattar Bjørn Sortland, fylkesordførar Jon Askeland og prost Svein Arne Theodorsen.