Lokal ladestasjon i reklamefilm

Innspelinga føregjekk kring ladestasjonen på bryggja til Eide Fjordbruk ved Skålakaien. Men også oversiktsbilete filma med drone og køyring med vasski på fjorden vart inkludert. Den vakre sommardagen baud på perfekte tilhøve og omgjevnader.

Det aktuelle ladeanlegget vart opna i september i fjor.

– Anlegget er offentleg tilgjengeleg, men med prioritet til Eide Fjordbruk sine båtar, fortalde Steinar Iversen frå Eviny, selskapet som eig Plug.

Ser til Norge

Plug har levert totalløysinga, det vil seia infrastruktur og ladepunkt. Finske Kempower, med hovudkontor i Lahti, sytte for «hardwaren» til hurtigladedelen i anlegget. Begge bedriftene ynskjer å nytta reklamefilmen i si marknadsføring via eigne heimesider og i andre samanhengar.

– Heile verda ser til Norge når det gjeld utviklinga og bruken av ladeteknologi. Norge er i framkant, opplyste Mikaela von Martens, Kempower sin marknadsføringssjef for den nordiske marknaden.

Kempower har så langt fyrst og fremst satsa i Norden.

– Men vi ekspanderer no over heile Europa, og skal opna vår fyrste fabrikk i USA i løpet av året, la ho til.

Høgsesongen

Bjørn Hønsi Følling, sjef for maritim lading hjå Plug, var sjølv aktør på vasskia under innspelinga. Han opplyste at dei hadde filma i Våge på Tysnes dagen før.

– Vi ynskjer å visa fram anlegga vi har bygd og framsnakka dei, forklarte han.

Så om ikkje altfor lenge kan dei som er spesielt interesserte i ladeanlegg sjå filmen frå Rosendal.

– No når vi går inn i høgsesongen, blir det spennande å sjå korleis anlegget her fungerer, smilte Steinar Iversen.