Lokal kunstnar representert på Pride Art Oslo
Skeive kunstnarar har stått i bresjen for skeiv kulturformidling i Norge sidan 1970-talet. Pride Art sin kunstfestival «Wunderkammer» opna fredag 8. oktober, og her er mellom anna kunst av den utflytta kvinnheringen Aleksander Sahr representert.
Publisert
I fjor var det første gang sidan 1985 at utstillinga til den skeive rørsla ikkje vart gjennomført i Oslo, men i år er satsinga attende for fullt.
Pride Art «trur på at synlegheit er motgift til skam og stilltien, og kunnskap er motgift til fordommar og hat.» Då dei i år stiller ut 600 kunstverk av 130 kunstnarar i DOGA sine 1000m2 store lokaler, er det nettopp dette dei siktar mot å gjere.
Annonse
– Eg stiller ut på Pride Art Oslo for første gang i år, saman med over 100 andre skeive kunstnarar frå 25 ulike land, skreiv Sahr på Instagram då kunstfestivalen opna.
3D-sjølvportrett
Verka Sahr stiller ut på «Wunderkammer» handlar mellom anna om materialer, intimitet og maskulinitet. Blant desse er kunstnaren sitt første kommersielle verk; «Kropp til Salgs: Hode», som er eit sjølvportrett laga med 3D-skanner. Skanninga gjekk ikkje heilt etter planen, og Sahr vart sitjande å fylle ut det som mangla, og pusle saman bitane i eit modelleringsprogram.
– Modellen likna på ei øydelagt gresk statue, meir enn noko anna. Eg tok bitane av den øydelagte modellen inn i eit 3D-modelleringsprogram for å fylle inn alle hola. Det var litt snodig og poetisk å pusle saman min eigen kropp, informerer han.
Annonse
Sahr tek no ein mastergrad ved OsloMET. Han har tidlegare vunne Kvinnherad kulturstipend (2016), delteke i programmet «This Is It», og vore med på ein episode i tv-serien «Exit». I desse dagar er han dessutan kostymedesigner for «Maskorama». Utstillinga på DOGA står til 27. oktober.
