Løfta på plass med millimeterpresisjon
Tysdag vart på mange måtar ein milepåle nådd for Ænes Inkubator, i form av at 103 tonn betong vart løfta på plass i sjøen.
Publisert
Arbeidet med Ænes Inkubator går med full styrke om dagen, der ein arbeidsstokk på oppunder 80 no jobbar veka gjennom for å sikra framdriftplanane, som tilseier produksjon av fisk frå 2023.
Tysdag var kranskipet Tronds Lift 8 på plass på Ænes for å løfta på ein av dei viktige brikkene på plass, i form av ein betongkloss på 103 tonn.
Annonse
Sentral
Dagleg leiar for Ænes Inkubator Jan Gunnar Strand forklarer kva det var som vart seinka ned på fire meters djup slik.
– Dette skal fungera som ein sentral for oss. Me hentar sjøvatn opp frå 120 meters djup, for det sikrar oss stabil temperatur på vatnet året gjennom, og me får reint vatn utan humus og skit. Denne brukar me mellom anna til varmeveksling, og utnyttar energien som ligg i temperaturen til vatnet til å varma opp ferskvatnet som fisken skal leva og veksa i, seier Strand.
Sentralen er knytt i hop med anlegget oppe ved elva gjennom fleire røyr, og det er også laga til røyr som gjer postsmoltanlegget i stand til å senda levande fisk ned til kaien og opp i brønnbåtane når den tida kjem.
Annonse
– Me har støypt kassen på plassen her på kaien. Det er enklare enn å driva med forskaling i sjøen, forklarer Strand.
Det er Veidekke som er hovudentreprenør på arbeidet i, men med mange lokale underentreprenørar i arbeid på staden. Denne tysdag var svært mange av dei på plass i fjøresteinane for å sjå til at Tronds Lift 8 plasserte klossen rett.
– Han skal plasserast med presisjon. Det er byggegrenser og reguleringsplanar å ta omsyn til, og me har lyst å gjera det rett på første forsøk, seier Strand om løftet.
