Løft blikket – sjå kvarandre
Måndag sto skulehelsetenesta på stand ved fleire skular i Kvinnherad for å markera Verdsdagen for psykisk helse. Tema i år; å få barn og unge til å løfta blikka sine.
Publisert
På Husnes ungdomsskule kunne ein møta helsesjukepleiarane Gunn Heidi Eikemo Steine og Ann Helen Lyngnes. Dei hadde laga til kort med gode spørsmål som skulle få ungdommane til å tenkje litt etter.
– Det står til dømes ting som «korleis kan du gjere dagen god for deg og andre» og «nemn fem ting som gjer deg glad», seier Eikemo Steine.
Annonse
Dei ynskjer meir openheit rundt psykisk helse, og behovet for det er stort.
– Det er mange tema som kan påverke ein negativt, vere seg skilte foreldre, mobbing, sjølvfølelse, legning eller utanforskap. Dei unge sit gjerne inne med meir enn dei treng, og dei veit ikkje korleis dei skal opna seg opp, fortel dei to helsesjukepleiarane.
#Løftblikket
I år er det 30 år sidan verdsdagen for psykisk helse vart oppretta som ein internasjonal FN-dag, og dagen vert markert i over 150 land. Temaet i år er at alle treng nokon, og vi treng kvarandre.
Annonse
– Vi ser at mange slit no, spesielt etter pandemien. Folk har følt seg innestengde og einsame, og slike kjensler er ikkje berre å rista av seg. Sosialt fellesskap er så utruleg viktig, og kanskje spesielt dei unge treng å kjenna på eit tilhøyr, seier Eikemo Steine, og legg til;
– Det var ein her på standen som sa at det var kjekt å koma tilbake til skulen, og at det har vore tungt å sitja heime.
Levekårsundersøkinga til Statistisk Sentralbyrå visar at i 2020 var 11% av befolkninga over 18 år einsame. Det er ei auke på 4% frå 2012. Dette inkluderer ikkje barn og unge under 18 år, som er nokon av dei mest utsette.
– Derfor er det viktig å arbeida for å førebygga einsamheit og utanforskap, seier Lyngnes.
#Løftblikket er eit tema som Verdsdagen ynskjer at skal motivera til tiltak og initiativ som kan redusera avstanden mellom menneskjer. Vi har alle ganske like grunnleggande behov, og alle treng å bli sett og høyrd.
– Vi må løfta blikket, og vi må sjå kvarandre. Det er så viktig å skapa tryggleik blant ungdom, og å vera til stades i miljøet deira trur eg betyr mykje, avsluttar Eikemo Steine.
Annonse
I tilfelle dei måtte lokka nokre ungdommar hadde dei ei skål med Twist og drops, snilt donert av helselaget på Sunde, Valen og Husnes og Lions.
