Løesaka: – Skal skrella vekk alt som er subjektivt

Som kjent har ikkje fleirtalet av politikarane vore særleg nøgde med kommuneadministrasjonen si handtering av løesaka. Heller ikkje den eksterne gjennomgangen av saka, som Bergen kommune tok på seg, roa gemytta. Spesielt sidan det i deira rapport kom fram at dei ikkje hadde vore inne i løa og sjekka tilhøva.

I haust tok difor kommunedirektøren kontakt med selskapet Sweco. Dei skal føreta ein ny uavhengig gjennomgang, og er allereie kome godt i gang. Torsdag var to av deira medarbeidarar i kommunestyret for å orientera om prosessen. Dei stilte med Wilhelm Skar, gruppeleiar for byggjesak og eigedomsrådgjeving, og Marita Lie, jurist og rådgjevar.

– Så langt har vi motteke heile saksarkivet, meir eller mindre, frå Kvinnherad kommune. Vi har i fyrste omgang gått gjennom alle saksdokument heilt attende til konsesjonssaka i 1997, samt byggjesaka i 2012 og ny byggjesak i 2018, fortalte Skaar.

Løesaka: Har bestilt uavhengig vurdering

Skrella vekk

Slik Sweco ser på oppgåva, handlar den om å setja saka opp mot Plan- og bygningslova og Forvaltningslova, og så sjå på kva som er søknadspliktig, kva som ikkje er søknadspliktig, og korleis kommuneadministrasjonen, politikarane og statsforvaltaren har behandla saka.

– Vår oppgåve er å sjå på dette reint objektivt. Alt som er subjektivt, er det vårt mål å skrella vekk, understreka Wilhelm Skar.

Marita Lie fortalde at selskapet har vore i dialog med både grunneigar og nabo, noko dei vil fortsetja med. Planen vidare er å gå gjennom dokumenta og fotografia på nytt, og setja opp ei tidslinje. Til slutt skal dei utarbeida ein rapport før kommunestyremøtet i februar. Sweco vil også koma med ei anbefaling til korleis kommunen bør handtera saka vidare.

Den 9. januar blir det synfaring i den berømte løa, og då vil Sweco ha med seg ein erfaren bygningsingeniør.

– Men det er viktig å understreka at dette frå vår side ikkje er ei tilsynssak, sa Marita Lie.

Løesaka: Kva vi håpar å oppnå

Har svikta

Øyvind Hardeland (Ap) sa seg nøgd med fagkompetansen som dei tilsette i Sweco har.

– Det er det som er utført på bygget heile saka dreiar seg om, og som må ha fokus no. Då er det betryggande når du seier det skal vera fagpersonar med, for det er det vi som politikarar føler har svikta, sa han.

Wilhelm Skar minna då om at Plan- og bygningslova i utgangspunktet er ei «Ja-lov». Det betyr at ein må visa til paragrafar i regelverket for å kunna seia nei til eit tiltak. For Sweco blir kapittel 20 i lova viktig, for den handlar om kva som er søknadspliktig og ikkje-søknadspliktig.

– Her har vi avsnitt som seier noko om reparasjon, vesentleg reparasjon, hovudombygging med meir. Eg ser for meg at dette er det mest relevante her, sidan det er eit eksisterande bygg. Spørsmålet er «kva er gjort på låven, og kva er ikkje gjort på låven», analyserte han.

Meir kritikk mot løesaka: – Nesten heilt utruleg

Skapt mistillit

Ove Lemicka (Frp) har engasjert seg mykje i saka, «fordi vi er ombodspersonar for folk i kommunen vår», som han sa. Han òg uttrykte full tillit til Sweco.

– Det saka handlar om er at det har blitt gjort ting i saksbehandlinga som har skapt mistillit mot kommunen. Det har vore fleire rundar der vi trudde vi hadde retta opp i dette, og så har vi dotte ned i same sporet igjen, fordi ting ikkje blir belyst på – etter vår meining – rette måten, sa han.

Lemicka forstår det slik at naboane ikkje får vera med på synfaringa i januar, men oppmoda om at det blir halde ein god dialog med dei òg. Han ynskjer derimot at nokre politikarar får vera med.

– Rett og slett for å syta for at vi får tillit til at alt blir synfart no, argumenterte han.

– Vi kjem til å leggja til rette for at dei som ynskjer å vera med, kan det. Men til sjuande og sist er det opp til grunneigar, opplyste Marita Lie.

– Kva skjer i løesaka?