LO besøkte unge i sommarjobb: Lite å setja fingeren på i Rosendal
Kvart år er det fleire unge som får seg sommarjobb i Kvinnherad. For å passa på at bedriftene overheld gjeldande avtaler og har gode nok arbeidsforhold, reiser LOs sommarpatrulje rundt i heile landet for å ta ein prat med arbeidsgivarar og unge i jobb. Tysdag vitja dei Kvinnherad.
Publisert
For 37. året på rad har unge frivillige medlemmar og tillitsvalte sett av eit par veker av sommaren til å reisa rundt i fylket og utgjera LOs sommarpatrulje. Kvart år vert fleire tusen bedrifter besøkt. Målet deira er å hjelpa og rettleia unge som har sommarjobb. Tysdag stod Kvinnherad for tur, og første stopp var Rosendal.
– Me har vore innom fleire arbeidsplassar her i Rosendal og prata med unge sommarvikarar. Det er mange som har sommarjobb i år, og me er svært glade for at dei me har vitja så langt har gode eller i alle fall greie arbeidsforhold, smiler fagleg ungdomssekretær i LO i Vestland, Miriam Jordal Sorø.
Annonse
Auka kunnskapsnivået til unge i arbeid
Sommarpatruljen tar hovudsakleg ein prat med unge som har ein sommar-, ekstravakt- eller deltidsstilling. Formålet er ikkje å henga ut bedrifter, men heller å auka kunnskapsnivået til unge i arbeid.
– Målet er å finna ut om ungdommane har det bra på jobb, og om dei får det dei har rett på. Det er særleg arbeidskontraktar som kan mangla. Fleire veit eksempelvis ikkje kven som er verneombod, eller anna dei bør veta som arbeidstakarar. Men det er også mange unge som sit på god kunnskap om arbeidsmiljølova, og det er godt å høyra, seier Sorø før ungdomssekretær Joakim Hagen supplerer:
– Det viktigaste me gjer er å spreia informasjon, slik at arbeidstakar forstår kva rettar ein faktisk har. Så langt har me berre møtt på takksame arbeidsgivarar og unge i jobb. Me merkar at begge partane set pris på at me kjem å informerer, og det er eit stort engasjement rundt det.
Annonse
Gladpatrulje
Verneombudet er ein person som blir valt av og blant de tilsette, og som har eit særleg ansvar for å følgja opp at det er forsvarleg HMS og arbeidsmiljø på arbeidsplassen.
Sorø seier at dei er ein gladpatrulje. Samstundes er det alvor når ein bedrift ikkje følgjer arbeidsmiljøloven.
– Om me finn ut at bedrifta bryt med arbeidsmiljøloven kan me ta dette med vidare.
Det kan då vera snakk om vidareformidling av informasjonen til skatteetaten og andre statlege organ.
– Men dei aller fleste arbeidsgivarar vil jo at dei tilsette skal ha det bra, så når me finn brot er det stort sett grunna mangel på kunnskap hjå arbeidsgivar, sluttar ho.
