Litteraturløype i Husnesparken: Vil lokka folk frå skjerm til perm
Stiftinga Framifraa vart nyleg etablert her i kommunen. Ein gjeng engasjerte litteraturformidlarar synest det er på tide å synleggjera kor mange gode forfattarar som kjem frå Kvinnherad.
– Kvifor har me ikkje gjort dette før?, utbryt Trude Hege Bergesen, om litteraturløypa ho er med på å ta initiativ til.
Med på laget i Framifraa har ho Heidi Sande Gertz og Jorun Larsen. Alle tre arbeider med litteraturformidling i kvardagen sin. Bergesen er bibliotekar, Gertz jobbar i Norli og Larsen er styreleiar for Kyst- og Litteratursenteret på Bergslagen. Men dei understrekar at dei startar dette initiativet som privatpersonar, ikkje på vegne av nokon andre.
Annonse
Vil styrka identitet, stoltheit og samhald
– Eg synest det er viktig å få fram kor utruleg mange gode forfattarar me har herfrå, fortel Trude Hege Bergesen, som fekk idéen for nokre år sidan.
Jorun Larsen les opp ei imponerande lang liste dei har laga seg over gode forfattarar, der namn som Per Olav Kaldestad, Ragnar Hovland, Brit Bildøen, Lars Amund Vaage, Anne Karin Fonneland og mange andre er nemnt. Formålet til stiftinga er å gjera lokallitteraturen meir tilgjengeleg, og dei ser for seg at dette kan vera med på å styrka identitet, stoltheit og samhald i kommunen.
– Parken kan bli endå meir attraktiv for alle i kommunen, og kan vera eit fint tilbod både for turistar, fastbuande, skular og barnehagar, seier ho.
Annonse
– Forfattarane er jo anerkjente ikkje berre her lokalt, men også nasjonalt, seier Heidi Sande Gertz.
Treng ei haldningsendring
– Me har også eit mål om å vekkja leseglede, både for unge og vaksne. Denne gleda kan bidra til større leselyst og lesemeistring. Kanskje folk til og med får lyst til å skriva sjølv, utdjupar Jorun Larsen.
Trude Hege Bergesen meiner me lever i ei tid der folk les mindre, og har vanskar med å fokusera, på grunn av dei nye skjerm-vanane våre. Ho håpar at dette prosjektet kan bidra til ei haldningsendring, og få folk til å kikka opp frå skjermane sine.
– Frå skjerm til perm, smiler Heidi Gertz.
Stiftinga har lete seg inspirera av mellom anna ein «poesipark» i Larvik, og ein tursti i Strandebarm med ulike dikt av Jon Fosse langs løypa.
Annonse
– Me ser for oss nokre litteraturpunkt i Husnesparken som start på prosjektet. Det kan vera ein kunst-installasjon, ein lyddusj, kanskje ein stein eller ei aluminiumsplate felt ned vegen, der ein kan lesa sitat frå litteraturen eller fakta om ein forfattar, forklarar litteraturformidlarane entusiastisk, i munnen på kvarandre.
Avhengig av at folk er positive
Det er altså ikkje stiftinga Framifraa som skal utforma desse litteraturpunkta. Deira rolle er å leggja til rette for at noko sånt skal kunna gjennomførast. No vil dei setja seg ned og søka om pengar til utforminga frå ulike hald, for å gjera Kvinnherad-forfattarane tilgjengelege for fleire.
– Me har snakka med eining for Veg og Park i kommunen, og dei stiller seg i utgangspunktet positive til idéen, men både dei og me veit at me er heilt avhengige av at fleire er med på dette, både grunneigarar og andre, forsikrar Jorun Larsen.
Stiftinga Framifraa er open for innspel frå alle om denne idéen, og har eit mål om å få sett opp to litteraturpunkt årleg i ei tid framover. Dei vil starta i Husnesparken, men vil ikkje nødvendigvis avgrensa løypa til å vera berre der.
– Me vil eigentleg spreia idéen i heile kommunen, men Husnesparken er ein fin plass å starta, seier Larsen.
