– Litt sjokolade og leik gjer susen
Kvart år tek Åkra oppvekstsenter kring fire fjellturar i området kring skulen og bygda. Fyrste turen i år gjekk i førre veke til Årtunstølen, der både skulen og barnehagen var med.
– Årtun er ein av dei seks storgardane som var i Åkra. Me prøver å læra dei litt om dei ulike gardane i samband med det, og så prøver me å syna dei ein del av stølane til fjells, fortel rektor Bjørn Rune Bergane.
– No er turen me hadde til Årtunstølen ganske lett, berre eit par timar, og me går ganske seint slik at alle har høve til å henga med. Det å gjera noko saman i lag med heile oppvekstsenteret er viktig. På denne turen var dei yngste 4-5 år, men det hender at me tek med oss 2-3-åringane på turar også, fortset rektoren.
Annonse
Gjer susen
Skulen har derimot planar om fleire turar før sommarferien tek til. Denne veka går turen til Ytre Matre for å besøka nokre store fine gardar som ligg til halvvegs opp i fjellet, før dei så vonar å gå over fjellet tilbake til Åkra.
– Detaljane her er ikkje heilt spikra endå, og turen er litt lang. Dersom me tek den ruta, så blir det i så fall den lengste turen me har hatt. Uansett blir det ein tur i det område der, fortel Bergane.
– Kva tykkjer elevane og ungane om å få bli med på slike turar då?
Annonse
– Dei fleste tykkjer det er veldig kjekt, sjølv om nokre ikkje er så van med å gå i fjellet og tykkjer at det er litt tungt. Difor plar me sørgjer for at det blir ei oppleving med både kos og sosialt i tillegg til trening. Litt sjokolade og leik gjer susen, svarar Bergane.
