Linda Løvfall blir ny dagleg leiar i Book Hardanger
Den 1. februar startar Linda Løvfall frå Løfallstrand i ny jobb som dagleg leiar for Book Hardanger AS.
Publisert
Sidan i haust har styret i Book Hardanger AS jobba intensivt med å finna rett person til å ta over leiarrolla etter Alexander Hillerich. No kan dei offentleggjera at Linda Løvfall er tilsett.
– Vi er veldig nøgde med å få Linda med på laget. Hennar bakgrunn og erfaring passar Book Hardanger godt i den fasen selskapet er i no, og ho er særs motivert. Linda Løvfall har med seg solid erfaring frå reiselivet, ein sterk teknisk bakgrunn, og gjennomgåande kjennskap til Hardanger-regionen når ho tar til i stillinga 1. februar, seier styreleiar Mona H. Hellesnes i ei pressemelding.
Annonse
Auka lønnsemda
Løvfall har brei kompetanse innan forretningsutvikling, marknadsføring og teknologi, og har i ei årrekke tilbydd kurs i reiselivssektoren. No kjem ho frå jobben som Seniorrådgjevar IT og reiseliv hjå Bymuseet i Bergen.
«Alt dette kjem godt med når Book Hardanger no går inn i sitt andre driftsår. Målsetjinga til selskapet er å gjera det enklare for turistar å oppleva Hardanger og gjera det enklare å bestilla opplevingar i regionen. Frå å ha hovudfokus på sal over disk og å byggja ein sterk produktportefølje i 2024, er det no onlinesal og pakketering av produkt som står øvst på agendaen for 2025», vert det opplyst i pressemeldinga.
– Eg gler meg veldig til å få bruka både teknologi- og reiselivskompetansen for å bidra til å løfta reiselivsbedriftene i Hardanger. Saman med det dyktige teamet i Book Hardanger, vil vi arbeida for å auka lønsemda og verdiskapinga for reiselivet i Hardanger, seier Linda Løvfall
Annonse
Perfekt kombinasjon
Ho har i årevis vore tilsett som rådgjevar for Baroniet i Rosendal med ansvar for mellom anna marknadsføring og produktutvikling. I tillegg har ho også eigedom i Ulvik og hytte på Garen i Eidfjord.
«Ein perfekt kombinasjon for Book Hardanger, som mellom anna har hovudkontor i Eidfjord», heiter det.
Book Hardanger AS vart etablert hausten 2022 med målsetjing om å auka verdiskapinga i reiselivsrelaterte verksemder i Hardanger. Primært gjennom sal på digitale plattformar, men òg lokalt i nokre destinasjonar. For å gjera det enklare å oppleva Hardangerregionen, skal selskapet drive produktutvikling og identifisera gode transport- og mobilitetsløysingar.
Book Hardanger AS er eigd av Fjord Tours Group med 33%, lokale reiselivsaktørar med 33% og dei to kommunane Eidfjord og Ulvik med til saman 33%. Selskapet har fire tilsette.
