Likte tankane om nytt vegselskap: - Kjem raskare til målet om vi står samla

Hordfast AS signaliserte tidlegare i år at dei no ynskjer å jobba for vegutbetringsprosjekt langs heile traseen mellom Bergen og Stavanger. Samstundes ynskjer selskapet å få inn fleire kommunar som eigarar, og Kvinnherad har i den samanheng fått tilbod om å kjøpa aksjar for 100.000 kroner.

Politikarane i Kvinnherad har hittil vore litt lunka. Men på førre møte vart det bestemt å senda ordførar Vegard Bjørnevik til eit informasjonsmøte som Hordfast arrangerte, og så ta opp att tråden etterpå.

Tysdag 3. desember var Bjørnevik (H) og rådgjevar Peder Sjo Slettebø på tur til Bergen for å delta på det nemnde møtet. I Formannskapet to dagar seinare refererte dei derifrå. Duoen kunne fortelja om god oppslutnad på møtet, både frå kommunane som ligg langs traseen, men også frå kommunar som ynskjer å knyta seg på E39, som til dømes Kvinnherad.

Raskare til målet

Slettebø viste til at Hordfast ikkje vart prioritert i siste utgåve av Nasjonal transportplan.

– Mykje av utfallet skuldast nok at Vestland fylke ikkje var samd internt, meinte han.

Men no ynskjer ein å tenkja annleis om påverknadsarbeidet innan samferdsle. Ideen er å samla alle prosjekta på strekninga, frå Rogfast til nytt løp under Bømlafjorden, vegen over Stord, Hordfast (brua mellom Reksteren og Os), Ringvei Øst (for å leia gjennomfartstrafikken utanfor Bergen sentrum), og Nordhordlandstunnelen.

– Eit forslag er at staten set av 4,5 milliardar kroner kvart år i 20 år. Då kan Vegvesenet byggja heile strekninga på 20 år, opplyste Peder Sjo Slettebø.

Han understreka at alle kommunane som skal vera med i selskapet, må seia seg samd i traseen som er valt.

– Teorien er at ein vil koma raskare til målet om vi står samla, refererte han.

Vegard Bjørnevik la til at Hordfast AS planlegg å skifta namn til «Stavanger to Bergen» (eventuelt Stavanger 2 Bergen). I logoen skal visst g-en i begge byane skrivast med stor bokstav. Ordet «to» spelar både på betydinga «til», men òg at det er to byar og at reisetida i framtida kan bli to timar.

– Målet er at vi i 2025 skal koma skikkeleg i gang med dette selskapet, sa han.

Bjørnevik føreslo å la saka modna litt, og at ein utsette til over nyttår med å ta endeleg stilling til eventuelt aksjekjøp. Det var Formannskapet heilt med på.

Er litt bakom

Ove Lemicka (Frp) tykte det var spennande tankar som vart lagt fram.

– Det er veldig viktig å laga eit godt samarbeid på Vestlandet. At Stortinget stoppa prosjektet, er etter mi meining eit tilbakeslag av mellombels karakter. Ideen om ei strekning som får statlege midlar år for år, trur eg er god, analyserte han.

Synnøve Solbakken (Ap) følgde opp:

– Ferjefri E39 er det største vegprosjektet i landet, i alle fall i vår region. Det er klart at Kvinnherad ikkje kan sitja på sida. Eg er oppteken av at vi må vera med i denne prosessen, og aller helst kunna påverka. Det er utruleg viktig. Vi er litt bakom, og der kan vi ikkje sitja lenger. Og så må vi få korta ned ferja over fjorden og kopla oss på denne vegen, vurderte ho.

Også Jostein Rødland (INP) støtta at ein no ser på heile strekninga.

– Det er ein veldig god idé å løyva fleire milliardar over 20 år, slik at vi heile tida får midlar til å utvikla prosjektet, sa han.

– Vi behøver ein god veg viss vi skal vera ein reell utfordrar til Austlandet, slo Per Harald Havnen Löfgren Johansen (Ap) fast.