Likte ikkje svaret frå kommunen: Ber om dokumentasjon
I eit brev til Kvinnherad kommune datert 17.11.23 stilte Bente Haugen og Astri Måkestad spørsmål ved kvifor ikkje kreftkoordinatorstillinga var 100 prosent slik det er vedteke av kommunestyret.
Svaret dei fekk frå avdelingsleiar Ingegjerd Meltzer Tufte uroa dei nok til at dei no vel å fylgja opp saka på nytt. I svaret står det blant anna at «kreftkoordinator vart tilbydd 100 prosent stilling, men ynskte sjølv å jobba 80 prosent».
Ikkje godt nok
Annonse
– Me vil presisera at det ikkje er kreftkoordinator me kritiserer her. Me ynskjer å ettergå praksis i administrasjonen i Kvinnherad kommune. Er det ikkje arbeidsgjevar som skal sjå til at stillingsstorleik er i samsvar med vedtak og budsjett? spør Haugen og Måkestad i eit nytt brev til kommunen.
Dei engasjerte damene meiner at kommunen sjølv har presisert at det er Vurdering og Koordinerande eining som har ansvar for dei siste 20 prosentane av stillinga. Vidare ber dei om dokumentasjon frå VoK på at dei 20 prosentane blir nytta i tråd med føremåla.
– Me møter kreftramma og pårørande som seier at dei har bruk for tett oppfylging av personar med relevant utdanning innan fagfeltet. Det er ikkje utan grunn til at dei gong på gong seier til oss at dette ikkje er godt nok, og me må stå på vidare. Og det er nettopp det me gjer no, avsluttar Haugen og Måkestad i brevet.
