– Ligg allereie an til tidenes dyraste kommunestyremøte

Johansen stadfestar at SV har bede om felles budsjettdiskusjonar, men koalisjonen konkluderte at det ikkje var grunnlag for slike samtalar. Rett og slett fordi det ikkje finst pengar å fordela.

– Realiteten er at når vi ser på det som kommunedirektøren har lagt fram, så er det allereie der ganske store overskridingar. Dermed har det vore tydeleg frå starten av budsjettrevisjonen at vi ikkje kan leggja opp til endringar utover det vi er nøydd for å gjera, seier Per Harald Havnen Löfgren Johansen til Grenda.

Kritiserer budsjettprosessen: – Skuffande

Storm i vassglas

Han meiner det såleis ikkje finst handlingsrom, sjølv ikkje til gode tiltak.

– SV kan alltids kritisera oss for å ikkje leggja opp til noko møte, men eg føler det er «storm i eit vassglas». Men eg forstår jo at det er kjedeleg at det ikkje er rom for å gjera dei endringane ein ynskjer, kommenterer Johansen.

Om dei tre konkrete tiltaka Silje Nordtveit Olsen trekkjer fram (ventilasjon på Malmanger skule, utbetring leikeapparat, og stoda innan Bu og habilitering) seier han:

– Dette er gode og viktige tiltak, absolutt, men det manglar heller ikkje på andre gode prosjekt. Ein bør difor finna ut om det er råd å gjera noko innanfor dei rammene som allereie er sett for vedlikehald i år. Byrjar ein fyrst å opna krana, så dukkar det fort opp andre tiltak som også krev pengar, analyserer han.

Helsehuset

Johansen røper at koalisjonen ikkje vil koma med nye løyvingar utover det kommunedirektøren føreslår. Hovudpunkta der er at driftsrammene vert auka med 29,2 millionar kroner til nesten 1,1 milliard i alt. Heile 26 av desse millionane går til Sektor Omsorg, Helse og sosial. Sektor Teknikk og Miljø får ei påplussing på 1,8 mill., medan Sektor Samfunnsutvikling aukar med 1,4 mill.

I tillegg til dette kjem saka om helsehus opp til handsaming. Kommunedirektøren har flytta investeringsmidlar for å sikra at prosjektet går vidare, men meiner det er avgjerande å hindra ytterlegare låneopptak til kommunen.

– Det ligg allereie an til tidenes dyraste kommunestyremøte, melder Per Harald Havnen Löfgren Johansen, og ser for seg eit langt og intenst møte.