Let seg imponera over Salmon Eye og framtidsplanane

– Ein fantastisk stad, var den umiddelbare reaksjonen til Rasmus Hansson då følgjet frå Miljøpartiet Dei Grøne vitja Salmon Eye og Eide Fjordbruk på fredag.

Hansson kom saman med politisk rådgjevar Håkon Lindal, kommunikasjonsrådgjevar Veronica Turnage og Andreas Ormevik frå Øygarden MDG til Salmon Eye saman med Eide Fjordbruk-sjef Sondre Eide og samfunnskontakt Vidar Hjartnes.

Lukka anlegg

Målet for besøket var å få vita meir om oppdrettsnæringa og samtidig diskutera løysingar for matproduksjon i sjø inn i framtida.

Den originale reiseplanen var å køyra inn til Skotberget, fjellsida som Furebergtunnelen går gjennom, for å sjå på staden Eide Fjordbruk skal etablera eit lukka anlegg. Is i Maurangerfjorden sette ein stoppar for nærkontakt med området, men planane vart grundig forklarte under seansen på Salmon Eye.

– Me ynskjer å setja ein standard for framtida, og ynskjer å gå i front på utvikling og berekraft, sjølv om det kostar pengar, sa Sondre Eide innleiingsvis for å forklara kva ambisjonar dei har.

– Svaret for oppdrettsbransjen er ei eller anna form for lukka anlegg, var Hansson sin konklusjon då han byrja å fortelja om sitt og hans parti sitt syn på korleis oppdrett av laks bør føregå i framtida.

Han peika på fleire grep som bør gjerast:

– Definisjonen på forureining er ressurs på feil plass, slik til dømes laksemøkk har vore til no. Når ein i lukka anlegg byrjar å bruka det til å laga biogass, så blir det brukt som den ressursen det har potensial til, var mellom eksempla Hansson nytta.

Konverteringsordning

– Det er ekstremt kjekt å sjå at det er engasjerte fagfolk som gjer desse miljøgrepa, utan å vera politikarar. Det som har vore problemet sidan kring år 2000, er ikkje bransjen, men politikarane som ikkje har vore villige til å syta for rammevilkår til at bransjen kan bruka teknologien som tilgjengeleg for å gjera det rette, meinte Hansson.

– Me trur lakseskatten, som no blir diskutert opp og ned, kan vera eit verkemiddel til å fremja meir miljøvenleg oppdrett. Men kva er dei viktigaste verkemidla de meiner må vedtakast? spurde Hansson.

– To ting, svarte Sondre Eide kontant:

– Ei konverteringsordning frå opne til lukka merdar, der du får ein konverteringsnøkkel til innbyte av opna konsesjon til lukka. Det andre er at det kan vera forskjell på skattlegginga av ein open og ein lukka konsesjon, foreslo Eide.

– Driv du i lukka anlegg, og samlar opp 90 prosent av slammet, har ikkje lakselus og ikkje påverkar det eksterne miljøet, bør du kanskje betala noko anna i skatt enn dei som er i opne merdar, argumenterte Eide.

– Det er ein logikk i dette forslaget i dette forslaget, svarte Hansson.

– Heile omgrepet grunnrente er eigentleg leige av ein felles ressurs. Viss du belastar denne ressursen mindre – som gjennom eit lukka anlegg – så burde skatten vore lågare, istemte stortingsrepresentanten.

– Dette er noko me kjem til å gå rett tilbake til Stortinget og fremja som forslag, lova Hansson.

– Begeistra

Før diskusjonen om lukka anlegg starta, fekk Hansson og MDG-delegasjonen ei om vising i visingssenteret Salmon Eye, inkludert informasjonsvideoar og quizar med opne spørsmål som er meint å setja i gang hovuda til dei som vitjar Salmon Eye. Dette gjorde inntrykk på delegasjonen.

– Dette er ei futuristisk boble i Hardangerfjorden, men det er imponerande det Eide Fjordbruk har gjort her, og ikkje minst at dei vil bruka mykje pengar på dette, vurderte ein begeistra Rasmus Hansson.

Sondre Eide og visningsvert Laila Hervold Langesæter meinte det var vanskeleg å vita kor mange dei skal ta inn i Salmon Eye i gongen, og kor lenge skal dei vera inne.

– Me tilpassar undervisingsopplegget om lågsesongen. Turistsesongen blir litt annleis, med ein annan pågang og kanskje kortare besøk, analyserte Langesæter.

– Eg er uansett begeistra for dette, smilte stortingspolitikaren, som etter eige utsegn reiste frå Salmon Eye med mykje nyttig i bagasjen.