Leik og moro på handballdag
Kvinnherad Handballklubb inviterte alle fyrsteklassingar til handballdag i Husneshallen laurdag. Barna var både høgt og lavt, og nokre gjekk nok der ifrå med ein ny favorittsport.
Laurdag arrangerte Kvinnherad Handballklubb handballdag for alle fyrsteklassingar i kommunen. På programmet stod det sjølvsagt teknikkar, skot på mål, men og litt leik og moro.
– Me arrangerer ein slik handballdag for at dei yngste skal få prøve ut korleis det er å spela handball, og forhåpentlegvis får dei lyst å fortsetje. Me har fleire jente lag, men ingen gutar. Det hadde difor vore kjekt om nokre gutar ynskja å byrja på handball, men også fleire jenter, seier Anita Røen som sit i styret i Kvinnherad Handballklubb.
Artikkelen held fram under annonsen.
Det var fyrsteklassingar frå Halsnøy, Underheim, Valen og Sunde som var mest representert. Totalt var det 18 barn som ynskja å læra seg handball.
Ungane vart trena av fire handballjenter frå damelaget. Både Vilde Emmerhoff, Selma Kleveland, Martine Røen Landa og Ingrid Johansen syns det var givande og kjekt.
– Det er veldig kjekt å trene barna. Eg var handballtrenar for sjuåringane i fjor, og likte det svært godt. Sjølv har eg spelt handball i tolv år. Når me i dag trenar fyrsteklassingane er det viktig å ikkje berre trene, men ha det morosamt og. Difor legg me tilrette for leik i nesten kvar øving. Under tikken må dei mellom anna halda i ein ball, slik at dei blir vant med det, smiler Vilde Emmerhoff (18) frå Halsnøy.