Leiinga ved Rosendal skule: – Strukturendringar er det einaste realistiske

Leiinga ved Rosendal skule meiner at endringar i skulestrukturen er det einaste som realistisk sett vil gjera Kvinnherad kommune i stand til å oppfylla ambisjonane sine innan skulesektoren.

Leiinga ved Rosendal skule, det vil seia Hanne Hesjedal - avdelingsleiar Mauranger skule, Heidi Hatteberg - avdelingsleiar Malmanger skule, Rune Melheim - avdelingsleiar Rosendal ungdomsskule og rektor Bjørn Olav Tveit, har som mange andre sendt inn uttale til oppvekstkårplanen. Kvartetten er samde i fleire av konklusjonane i planforslaget.

«Vårt viktigaste innspel til den pågåande prosessen, er at vi gjev vår fulle tilslutning til eit høgt ambisjonsnivå på vegner av born og unge. Vi oppfattar at planen inneheld dette. Det er vidare vår oppfatning at Kvinnherad kommune per i dag manglar høge ambisjonar på mange viktige område innan oppvekst», skriv dei.

Leiinga ved Rosendal skule støttar difor premissen i planane om at ein enten må frigjera midlar gjennom omorganisering og strukturendring, eller tilføra oppvekstsektoren midlar som gjer at ein kan realisera viktige tiltak.

«Vi meiner at ein kan skapa ein god oppvekst for alle born innanfor dagens skulestruktur, men at ein då må tilføra både skulane og hjelpeapparatet betydelege midlar. Det er likevel vår vurdering at ei strukturendring er det einaste realistiske alternativet til å få realisert ambisjonane i planen. Vi fryktar konsekvensane av ei ytterlegare ostehøvelnedskjering innanfor dagens struktur», vert det analysert.

Dei stemmelause

Å tilføra oppvekstsektoren meir midlar for å oppretthalde kvaliteten i ein desentralisert struktur, reknar dei som svært usannsynleg.

«Små skular kan også ha sine fordelar, og mange av dei mindre skulane i Kvinnherad gjev tilbod av høg kvalitet for fleirtalet av elevane sine. I tidlegare struktursaker ser vi at både elevar og foreldre er glade i skulen sin og argumenterer godt for å bevara den. Det er likevel ein fare for at det finst stemmer som ikkje kjem fram i debatten, og at desse stemmene tilhøyrer elevar som treng ei eller anna form for særskild tilrettelegging», understrekar kvartetten, og kjem med ei oppmoding til politikarane.

«Dei styrande i Kvinnherad kommune må sjølve vera ei stemme for dei stemmelause, og ein må forsikra seg om at ein ivaretek deira behov gjennom denne prosessen. Uansett strukturendring eller ikkje, må ein tilføra ressursar og forsikra seg om at kvaliteten i hjelpetenestene og i samarbeidet med skulane går opp».