Legobygging på høgt nivå

På Newtonrommet på Husnes onsdag denne veka fekk eit utval lærarar god innføring i både prosjektet og legoprogrammeringa av NLA-lærar Runar Eikhaug. Enkel legobygging er det nemleg ikkje.

Prosjektet er ein internasjonal konkurranse for born mellom 4-16 år der lag frå 110 ulike land er med og konkurrerer i ulike klassar og kategoriar. Konkurransekategorien som dei 18 laga frå Kvinnherad er påmelde i heiter Challenge, og rommar elevar mellom 9-16 år.

– Dei skal altså programmere ein robot til å løysa ulike oppdrag. Det går mykje ut på strategi for å finna den beste løysinga på dei ulike oppdraga. Det er nesten umogeleg å løysa alle oppdraga, for dei har berre to og eit halv minutt på seg, så då må dei samarbeide, planlegge og leggje ein strategi på korleis dei kan løyse flest mogeleg oppdrag, forklarer Newtonlærar Mathias Zimmermann.

Zimmermann fortel også at det i tillegg til sjølve programmeringa blir ein presentasjonsdel av kjerneverdiane, samt ein forskingsdel der ein skal forska på noko. Akkurat kva dette blir i år veit ein endå ikkje, meir informasjon om heile prosjektet kjem komande laurdag, 16. september.

Beste kurset

Men før elevane får gå i gong med prosjektet sjølve må lærarane kursast, og då Grenda var innom var gruppa i full gong med såkalla stresstestar for å testa robotane dei hadde laga i løpet av dagen. Interessa og engasjementet var absolutt til stades, og Zimmermann kunne bekrefta at denne gjengen var blitt heilt hekta. Også instruktøren og NLA-mannen Eikhaug skrytte av lærarane.

– Dette må vera det beste kurset eg har hatt. Ingen har tidlegare løyst oppgåva så tidleg på dag, skrytte Eikhaug, noko lærarstaben med rette var godt nøgde med.

Lærarane kunne også sjølve bekrefta at dette var noko som fenga.

– Dette er kjempegøy, og ein føler jo stor meistring. Me har også fått til mykje i løpet av dagen, sa lærar ved Rosendal Ungdomsskule Christoffer Fossli.

– Dette er jo noko heilt nytt for oss, og me har aldri vore med før så me veit ikkje heilt kva me går til. Men me er i alle fall veldig spente, la lærarkollega Helene Pettersen til.

Begge var i alle fall einige om at konkurranseinstinktet er tent og at dei heilt klart skal gå for å vinna.

– Absolutt, lo dei begge.

– Men viss me får til dette på seks timar, kva kan då ungane få til gjennom heile prosjektet? la Pettersen til.

11. november går altså Kvinnherad sin finale av stabelen i Kvinnherad Arena, der vinnaren går vidare til Skandinavisk finale i Mo i Rana 1. og 2. desember, og Zimmermann kjem med éi oppmoding.

– Me har behov for både sponsorar og dommarar for å få dette til å gå rundt, så dersom nokon ynskjer å bidra blir me glade, avsluttar Newtonlæraren.