Legg ut på miniturné

I november kunngjorde altså Gaa Paa at dei var i full gang med å produsera sitt tredje og siste Pink Floyd-prosjekt, trass i at dei tidlegare hadde sagt at det ikkje skulle bli fleire enn to.

Denne gongen er det likevel ikkje berre kvinnheringane som får oppleva det storslagne showet, både Stordabuane og Etnesbuane kan også no gle seg til februar. I fylgje ein av gitaristane i bandet Tor Jørgen Sætrevik er det fleire grunnar til at dei no også vel å ta produksjonen med seg ut av kommunen.

Mannskapsbyte

– Det er jo delvis basert på eigen vilje, for produksjonen er såpass stor og bra, men me har også fått ein del innspel frå dei som har sett på om at kvaliteten er veldig bra. Så det har me då prøvd å støtta etter beste evne, fortalde Sætrevik.

Gitaristen kan også fortelje at dei ligg godt an fram mot premieren på Husnes om éin månad trass i litt fråfall grunna sjukdom.

– No har me hatt lite grann mannskapsbyte på grunn av sjukdom, men det ser ut til å ha ordna seg heilt fint. Me hadde eit par øvingshelger i 2023, me har hatt éi samling no og skal ha nokre til framover. I tillegg til at me sjølvsagt er flinke til å jobba heima innimellom slaga, forklarte Sætrevik.

– Det blir veldig spanande, og ikkje minst blir det ei logistisk øving med tanke på å flytta scenen og slikt, noko som igjen set heilt andre krav til den biten av produksjonen. Men det blir veldig spanande å få vist det til fleire, la han til.

Sætrevik oppmodar også til å sikra seg ein billett medan det endå er mogeleg.

– Ja, billettane har verkeleg byrja å gå, så alt ser ut som at det går slik som sist, sa gitaristen.

Laurdag 17. februar og laurdag 24. februar spelar dei i høvesvis Etne og på Stord, medan premieren går av stabelen på Husnes 9. februar.

Éin av elleve

For å få på plass nok eit storslagent Pink Floyd-prosjekt har arrangørane også søkt om pengestøtte frå Sparebank1-stiftinga Kvinnherad, noko dei også no har fått innvilga.

Etter at stiftinga opna for ei endring av tildeling av midlar, der ein kan søkja året rundt og søknadar på pengegåver opptil 30.000,- blir handsama og eventuelt tildelte fortløpande. Denne veka kunngjorde Sparebank1-stiftinga Kvinnherad at dei fyrste gåvemottakarane utanom hovudrundane var klare, og Gaa Paa sitt Pink Floyd-prosjekt var ein av dei elleve mottakarane som kunne smila denne runden.

Pink Floyd prosjekt 3 fekk tildelt 30.000,- for at arrangørane skal kunne sikra at dei kan levera ei eineståande kulturoppleving også denne gongen.