Legg Handeland Gard ut til sals

Tysdag kveld starta det å sirkulera ein Facebook-post der det kom fram at Handeland Gard kjem til å bli lagt ut til sals i nær framtid.

– Eg kjem til å bli mykje utanlands i åra framover, og har Ekely også, og dermed har eg litt mykje eigedom å halda styr på, seier Rune Skarveland til Grenda.

Han kjøpte Handeland Gard i 2008, og gjort omfattande modernisering på staseigedommen på Handeland.

– Garden har fungert fantastisk for oss til no, og me har brukt staden til både kontor og representasjon. Me har rikeleg med plass både på Husnes og Sunde, og kjem til å samla kontorplassane våre på Sunde framover, seier Rune Skarveland.

Blant dei som kjem til å flytta på seg er Fossberg Kraft, men i teorien skulle det vera trongt på garden. I følgje Gule Sider har heile 22 firma adresse i bygget, men mange av dei er holdingselskap som Skarveland har interesse i.

Utanlands

Skarveland har saman med brørne bygd opp ein omfattande portefølje med selskap som dei heilt eller delvis eig. Det har gjort dei til gjengangarar på inntekts- og formuetoppen, og han var blant anna den med høgast inntekt i Kvinnherad i 2022.

– Eg bruker Ekely (bustaden hans, journ.merk) mykje, sjølv om Handeland Gard som stad for å representasjonshendingar har vore framifrå, så gjer eg det mykje heimefrå også. Me har ein gut som skal til Oxford og gå på skule, så me kjem til å vera langt mindre i Kvinnherad enn me har vore til no.

Sjølve salsprosessen er ikkje komen så langt.

– Me kjem til å laga eit prospekt på eigedommen, men me kjem ikkje til å forhasta oss i denne omgang.

– Har du hatt interessentar på tråden?, spør Grenda onsdag morgon.

– Det har blitt nokre telefonar allereie, ja, svarer Skarveland.