Lavrans gjorde eit loppekupp
Fleire hundre loppejaktande personar fylte opp salen i Rosendal samfunnshus då Rosendal Skulekorps arrangerte loppemarknad laurdag. Lavrans Sunde Haugland (11) var ein av dei, og han var stornøgd med dagens loppefangst.
Publisert
Sist oppdatert
Då dørene opna klokka 11.00 var det ein lang kø som venta på å få koma inn. Loppemarknaden i Rosendal samfunnshus i regi av Rosendal Skulekorps er mektig populært, spesielt etter to års koronapause.
Innanfor var det fullt, både av menneske og lopper, og mange hadde tatt turen for å sjå om dei fant seg noko dei trengte, eller som kunne vera kjekt å gje i julegåve. Fleire nytta mykje tid med eit velfylt bokbord, og kunne nøgd traska heimover med to-tre-fire posar med nye bøker. Leikeavdelinga var stappfull av nøgde barn og unge som fann seg mange kjekke skattar.
Annonse
Lavrans Sunde Haugland var stornøgd med loppefangsten sin.
– Det var mykje tøft å finna her. Eg har blant anna funne meg ein hatt, ei kattemaske, eit sverd og ein pistol. Alt for ein billeg penge. Sjå kor kul denne hatten er då, seier Lavrans medan han tar på seg hatten og stiller seg opp slik at bladfyken kan knipsa eit bilete. Deretter for han ut i folkemengda for å gjera opp for seg.
Fantastisk kjekt
Det er ikkje vanskeleg å sjå at denne loppemarknaden er blant årets høgdepunkt for mange. Og det er heller ikkje vanskeleg å sjå at det krev god førebuing for å få til noko slikt.
Annonse
– Førebuinga har gått veldig fint. Heldigvis fekk me byrja å rigga oss til på torsdag, sidan skulane hadde planleggingsdag i går, seier Liv Signe Ulvestadbakken i Rosendal Skulekorps.
Og med folkefull gymsal store delar av dagen, hadde den ferske loppesjefen Tor Skeie Olsen og resten av Rosendal Skulekorps all grunn til å vera nøgde.
– Dette er mitt første år som loppesjef, noko som er veldig gøy. Folk har vore svært flinke til å levera inn både stort og smått, så salen er fylt til randen, både oppe og nede. Det er mest nips me har fått inn, men òg mykje bøker og klede. Det er fantastisk kjekt å sjå den store mengda av lopper og alle som kjem for å handla seg noko, smiler Skeie.
