Lavrans er så lei av korona at han no har skamslått viruset

Sjeldan har det å vera koronalei gitt så fysiske utslag som det Lavrans sin tiårsdag skulle få by på.

– Han hadde ideen heilt sjølv, og er heldig som har ei pappa som er kunstnar og kan laga til noko slikt, seier mamma Gøril Skeie Sunde når Grenda spør om bakgrunnen for koronapinjataen som førre helg fekk så grundig juling i Rosendal.

Slå det ned

Det beste er nok likevel å få Lavrans sjølv til å forklara.

– No har me vore gjennom dette koronagereiene, og håper me snart er ferdige med det. Derfor tenkte eg at det hadde vore litt gøy å slå ned koronaen på skikkeleg måte.

– Er det noko du hadde tenkt på lenge?

– Nei. Eg skulle ha bursdagsselskap, og måtte finna på noko litt kjapt, seier den kvikke tiåringen.

Som tidlegare avslørt blei løysinga å få pappa til laga pinjataen.

– Eg bestilte det hos pappa, som fann nokon greier på youtube, og så gjorde han dei greiene, forklarer Lavrans.

«Dei greiene» er i dette tilfelle omfattande koking av pappmasjé.

– Han klipte opp masse papp og kokte det til ei grautaktig greie som likna på bæsj. Og så forma han det til dei tuppane på koronaviruset, forklarer Lavrans.

Han hadde ikkje sett det ferdige viruset før dei laga til bursdagen.

– Me skulle ta nokon bilete av det då me hengte det opp, men det datt i bakken. Då var eg redd det var øydelagt, men det tolte det. Det er visst ikkje så enkelt å øydelegga koronaviruset, seier Lavrans.

Faktisk viste koronapinjataen seg å vera omtrent like vrien å slå ned som pandemien sjølv.

– Det gjekk i alle fall ein halvtime før dei fekk hol på han. Til slutt var det ikkje bind for auge ein gong, smiler pappa Gaute Haugland.

Men dei klarte å få godteriet ut til slutt, til glede for selskapet på seks.

Vil til Legoland

Han har bursdag i slutten av mars, og fekk fjorårets niårsdag sabotert av den nasjonale nedstenginga. I år kompliserte påsken feiringa, som i staden vart lagt til slutten av april.

– Det var kjekt å få feira, seier han tilfreds.

Men det betydde noko arbeid på far.

– Spesielt dei tuppane tok tid. Det måtte tørkast i omnen i timesvis, for pappmasjéen var litt våt. Men det gjekk bra, meiner kunstnaren sjølv.

Sonen er godt nøgd med arbeidet som pappa gjorde.

– Dei andre syns pinjataen var veldig kul og gøy sjå på, melder tiåringen.

Lavrans er godt og grundig lei av koronapandemien si klamme hand over oss alle. No har han lyst å reisa.

– Ikkje sånn i hytt og pine, altså. Ikkje til Kina, for eksempel. Men eg har veldig lyst å reisa ein liten tur til Danmark, kanskje til Legoland. Eg har eit heilt rom oppe med Lego, og syns Legoland ser kjempekult ut. Og eg var ikkje eingong i Mikkelparken i fjor heller, så dit har eg også lyst å reisa i år. Eg har ikkje vore der sidan 2019. Eg var eigentleg litt sur i heile 2020, seier den taleføre tiåringen.

Han likar å jobba med modellkittet, der han lagar mange ulike figurar, både som dinosaurar og anna.

– Her har eg eit par år med modellkitt liggande. Elles? Teiknar, les, lagar dataspel, leikar med Lego. Eg gjer dei vanlege tinga som andre gjer, meiner han, før han tar med seg eit par sverd og er klar til å posera som koronakrigar.

– På stokken som me slo med var det gravert inn «koronamedisin», opplyser Lavrans.

Den virka godt, om me skal tru tiåringen.

– I alle fall på koronapinjataen.