Laurdag brakar det laus på ny

– UKM står jo for Ung Kultur Møtest, og det er akkurat det me skal, fortel kulturvert Karianne Solheim Markhus.

På laurdag brakar det laus for mellom 35-40 ungdomar som skal få stella i stand til ei feiande flott førestilling der ung kultur står i fokus.

Kjenne seg trygg

– Me skal møtast tidleg på morgonen i kinosalen på Husnes der me skal ha lyd- og lysprøvar, tekniske prøvar, samt at me skal eta i lag og generelt ha fokus på at kvar og ein av dei som skal vera med får tilrettelagt slik at dei blir trygge på det dei skal gjera, forklarer Markhus.

– Me har også med oss nokre deltakarar som skal vera med og pynta og gjera scenearbeid og den type ting. Heile poenget med dette er at ungdomane skal vera med på dette sjølve, at det ikkje er vaksne som bestemmer alt. Det er med, av og for ungdom, og det er viktig at dei blir høyrte og at det dei meiner blir teke på alvor. Det er veldig kjekt at me kan leggja til rette for det, fortset ho engasjert.

Markhus fortel også at det er viktig for dei at deltakarane kjenner seg trygge på det dei skal gjera, og at dei jobbar hardt for å få til det.

– Det er som regel alltid nokon som ikkje har opptredd så mykje før, og då er det ekstra viktig at dei kjenner seg trygge. Me har til dømes inne gode kompetente folk på lyd og lys, og mi rolle går mykje på å vera til stades og tilretteleggja, seier Markhus.

Kulturverten er godt nøgd med årets oppslutning, men merkar likevel at det er lenge sidan sist UKM.

– Det ber jo litt preg av at me ikkje har arrangert dei siste åra. Det er hovudsakleg eg som har hatt ansavaret, men sidan eg har vore langtidssjuk og ikkje har vore tilbake i full jobb før no nyleg så merkar me at me måtte jobba litt med rekrutteringa. Eigentleg jobbar me jo med dette heile året og arrangerer møte på ungdomssentera og slike ting, fortel Markhus.

Flest mogeleg

Førre gong det vart arrangert UKM var i 2021, og då vart det gjennomført digitalt grunna korona, men i år er dei tilbake og Markhus gler seg til laurdag.

– Eg gler meg veldig. Det plar vera ein fin dag og når alle kjem «til gards» og kjem inn i den gode flyten så er det veldig kjekt. Mange forbinder UKM med konkurranse, men det handlar meir om at ungdom skal møtast i kulturen. Eg har til dømes fått fleire innspel frå deltakarar som er meldt på men som også ynskjer å spela saman med dei andre. Det prøver me å tilrettleggja for, om det ikkje går denne runden, så kanskje neste gong, understrekar kulturverten.

– Og så er det sjølvsagt kjekt om det kjem flest mogleg, både unge og vaksne, og ser på, avsluttar Markhus.