– Lat kjærleiken vera det viktigaste

Kring 200 – kanskje meir – hadde møtt opp då organisasjonen Romsleg inviterte til Prideparade laurdag.

– Pride er ikkje enkeltpersonar, men alle i lag. Me trur på kjærleiken, og me vil ha eit lokalsamfunn med mangfald. Dessverre blir menneske som fell utanfor bli framleis mobba og utstøytt. Kjærleik skal ikkje straffast. Her i dag skal me feira den retten ein har vunne til å elska den ein vil. Våg å vera deg sjølv, det er berre du som kan vera deg, sa Anette Bergstø Jacobsen då ho på vegner at Romsleg opna Pride Kvinnherad 2022.

Det vart det halde eitt minutt stille arrangementet for å visa solidaritet med dei skadde og til minne om dei som døde i angrepet på utestadane i Oslo 25. juni.

Kjærleiken viktigast

Det var ei fargerik forsamling som skulle ut og gå i parade, men før opptoget starta, var det også tid til å høyra to foreldre fortelja om då deira dotter kom ut som skeiv. Anette Wangensten Eikenes og Wermund Vetrhus leverte ein sterk appell til publikum

– Ho er som alle 15-åringar. Ho var 13 år då ho kom ut. Mina er akkurat den same for oss no, som før ho fortalte oss. Ho sa «At det var skummelt å koma ut til oss», vekte noko for meg, sa pappa Wermund Vetrhus.

Anette Wangensten Eikenes oppmoda alle til å tenka på korleis ein snakkar til kvarandre, sjølv om ein trur andre ikkje høyrer, og refererte til utsegner som «Eg er glad mitt barn ikkje er homofilt».

– Barn får det med seg, påpeika ho.

– Viss me uttrykker desse kjenslene, så påfører me barna våre – og vaksne – smerte dei ikkje treng. Me har ein lang veg å gå, men har kome eit godt stykke, sa Vetrhus.

– La ungane koma og seia at dei er forelska, utan at kjønn har noko å seia. Lat dei unge få sleppa å bera på meir bekymring enn dei allereie har. Lat kjærleiken vera det viktigaste, oppmoda Wangensten Eikenes.

Nanna Sofie Fredheim fekk saman med pappa Atle Fredheim oppdraget med å stå for dei musikalske innslaga, noko ho gjorde både like før paraden tok til og som avslutting av arrangementet.

Landets koselegaste Pride

Paraden strekte seg ut som eit tog, og gjekk frå parkeringsplassen ved rådhuset, gjennom Skålagato og ned til Skålakaien.

Politiet var til stades under arrangementet, grunna tryggleiksvurderinga slike arrangement har fått etter åtaket i Oslo, og dei stoppa også trafikken gjennom Skålagato, slik at paraden trygt kunne ta seg att og fram.

Leiar i Human-Etisk Forbund Christian Lomsdalen hadde tatt vegen til Kvinnherad for å delta i paraden, fortelja om sitt engasjement for saka.

– Denne paraden er utruleg viktig for å bryta normene, og er med på å laga ei opning for mangfald. Men det skal ikkje berre vera openheit denne eine dagen, ein skal ha openheit for dette mangfaldet også på ein kjip, regnfull torsdag i november. Det blir viktig å fortelja at kjærleik og sex er meir enn berre to kjønn, sa Lomsdalen.

Pride Kvinnherad vart også det einaste offisielle pride-arrangementet han er med på i år.

– Dette er landets koselegast Pride, meinte Lomsdalen, og la til:

– Å inkludera mangfaldet i det me gjer på kan vera kjedeleg. Det at de stiller med fargerike hår og klede, gjer meg utruleg glad! slutta Lomsdalen.