Lanserte ordning for sletting av studielån

Kvinnheringar med studielån vil kunna nyta godt av ei ordning som regjeringa innfører. Dei som bur i dei minst sentrale kommunane får sletta delar av studielånet årleg.

Gjennom ordninga som regjeringa offentleggjorde onsdag, vil alle som bur i ein av dei 189 kommunane i Statistisk sentralbyrå (SSB) sine sentralitetssoner 5 og 6 i minst eitt år, få sletta 25 000 kroner av utdanningsgjelda i året frå januar 2026.

– Så lenge personen er busett i ein kommune som er omfatta av ordninga i minst eit år, og er yrkesaktiv, vil han få sletta utdanningsgjeld kvart år, fram til gjelda er nedbetalt, sa barne og familieminister Kjersti Toppe (Sp).

Mobilisering for distriktet

Ho var saman med partifellane Hans Inge Myrvold og Veronica T. Thorsen då politikarar frå regjeringspartia landet over offentleg fronta tiltaket samtidig.

Kvinnherad er ein av fleire sunnhordlandskommunar som ligg i SSB sine sentralitetssone 5 eller 6. Av kommunar som ikkje blir tilgodesett med ordninga er Stord, Sveio og Bjørnefjorden, for å nemna dei næraste.

Ordninga er tenkt organisert slik at opptening i 2025 gir reduksjon i 2026.

– Mi erfaring frå både ordførartida og tida i Helsekomiteen og Energi- og miljøkomiteen i Stortinget er at distrikta etterspør korleis ein skal få folk til å komma til kommunane, busetja seg og kunna leva gode liv. Desse kommunane har ei stor oppgåve med å handterer rett kvalifisert personell, ha nok og tilstrekkeleg kompetanse og folk. Så det er veldig viktig at me mobilisera rundt distriktskommunane, sa Hans Inge Myrvold i samband med offentleggjeringa av ordninga.

– Det handlar mellom anna om å få studentane heim igjen. Det er bra ein reiser vekk og tek ei utdanning, men me må passa på at dei kjem tilbake, sa Kjersti Toppe.

Rekrutteringstiltak

Ho påpeika òg at dette ikkje berre gjeld dei som eventuelt flyttar hit, men alle som bur her som har studielån. Ein kan gjerne jobba til dømes på Stord.

– Eg var i Trondheim førre veke og helste på mange studentar frå Kvinnherad, og eg skulle gjerne hatt med meg den nyhenda. Eg er veldig glad for at det kjem nokre insentiv og verkemiddel for rekrutteringa, sa Siri Rusten, som jobbar med rekruttering i Kvinnherad kommune.

Når Rusten onsdag skulle reisa til Oslo for å snakka heim studentar der, så hadde ho iallfall eit nytt ess i ermet.

Statsråden var klar på at intensjonen med ordninga er å få innbyggjarar tilbake til distriktskommunane etter dei er ferdige med utdanninga.

– Eg veit at mange lurer på å ta vidareutdanning – eller ei heilt ny ei for den del, men som vegrar seg for det på grunn av lånebelastninga dei får. No kjem det altså hjelp til nedbetalinga, sa Myrvold om ordninga.