Lang venteliste på «Iris»
Restauranten på Salmon Eye har berre vore open sidan midten av juni, men har allereie fått enormt god respons.
Publisert
Med oppslag i sosiale media og presse, er det kanskje ikkje rart at den unike opplevinga restauranten «Iris» tilbyr har fått stor merksemd.
– Det ser ut til at gjestane har gode opplevingar, og det tykkjer vi er veldig gøy, fortel dagleg leiar i Salmon Eye Sebastian Torjusen.
Annonse
Og at det er gode opplevingar kan ein sjå igjen besøket. Nyleg la dei ut ledige bookingar for oktober, som selde ut i rekordfart, og dei sit no med ei lang ventelista.
– Vi kjem ikkje til å få inn alle dei uansett kor mange som avbestiller, seier Torjusen og legg til;
– Vi er ikkje eit team som er rigga for den responsen vi har hatt. Det gjekk varmt i både telefon og mail, og vi måtte stengja telefonen på eit tidspunkt.
Tok heilt av i sosiale media
Annonse
Denne pågangen var altså ikkje heilt venta, men teamet på Salmon Eye gjer sitt beste for å gi alle den same, gode opplevinga når dei vitjar lakseauga.
– I starten visste kanskje ikkje folk heilt kva dei skulle forventa, men no når det er litt meir kjend, kjem dei med litt andre forventningar, seier Torjusen.
Heilt i starten hadde dei besøk av ein kjend Youtuber som besøker restaurantar rundt i heile verda, og det gjorde at dei fekk stor respons.
– Og så var det nyleg ein video på sosiale media som algoritmen såg ut til å lika, og då byrja det å ta heilt av, fortel Torjusen.
Nesten heilårs
Responsen gjer at det er mogleg for restauranten å halda ope utover hausten. Det kjem sjølvsagt an på vêr og vind, men planen er å ha ope frå februar til november.
Annonse
– For meg som er oppvaksen i Rosendal, er det veldig kjekt å sjå at det går an å få til noko, og at det kan gå over ein lenger sesong enn berre sumaren , fortel Torjusen.
No fokuserer dei på å kome seg gjennom hausten på ein god måte, før ein ferie og ny sesong står for tur.
– Det er viktig for oss å fortsetja å levera gode opplevingar. Etter hausten vil vi setja oss ned og evaluera korleis det har gått, kva kan vi gjere for at det blir bra for alle involverte? Det er opp til oss å syta for at det blir bra, seier Torjusen.
