Låner ut hytta si i vinterferien

Laurdag la Anton ut på Facebook at dei gjerne vil låna ut laftestova si til ein familie som ynskjer å reisa på vinterferie, men som ikkje har råd til å leiga ein stad å vera.

– Dette er noko me har tenkt på lenge. Me ynskjer gjerne å gje folk gode opplevingar, fortel Langeland over telefon.

– Me veit at det er ekstra mange som slit no i desse dyre tider. Så i og med at me har dette huset, som me leiger ut til vanleg, så hadde det vore veldig kjekt å kunna gjera ein forskjell for nokon som ikkje har høve til å reisa på vinterferie sjølv, fortset han.

Ikkje siste gong

Langeland kunne vidare fortelje at dei har fått mykje god respons på innlegget, og at det er ein heil del som har teke kontakt, men at dei endå ikkje har valt ut nokon.

– Det kom nok litt brått på for mange, og me la det nok ut litt seint. Det er ikkje alltid så lett å hiva seg rundt, fortel han.

Han vil også få fram at dei berre er glade for å kunna bidra.

– Det kan fort vera litt vanskeleg og flaut for dei som tek kontakt, men me prøver å sei at det blir heilt mellom oss, og at me ikkje ynskjer noko merksemd på dei som kjem, legg Langeland til.

– Dette er absolutt noko me kjem til å gjera fleire gonger. Det finst så mange fine menneske som berre treng lite grann draghjelp, avsluttar han.