Landa storavtale
Like før påske landa Energi Teknikk ein stor ny kontrakt i samband med utbyggingsprosjektet på Rullestad i Etne kommune.
– Dette er ein stor avtale for oss, og noko me har jobba lenge med. Då er det kjekt å få landa det, fortel dagleg leiar Arild Klette Steinsvik.
Sikra arbeid
Annonse
Prosjektet består av utbygging av tre kraftverk på Rullestad, der Småkraft og SKL eig femti prosent kvar. Det er Småkraft som skal stå for sjølve utbygginga, medan SKL skal stå for drift og vedlikehald. Heile prosjektet vil til saman gje 89GWh per år.
– Småkraft og SKL har sett ut ein totalentreprise til ein aktør som heiter Kraftpartnar AS på Voss, der dei skal levera ferdig kraftverk. Det er desse me har inngått ein strategisk samarbeidsavtale med, noko som inneber at me skal levera utstyr til den elektromekaniske utrustinga ved alle dei tre anlegga, forklarer Steinsvik.
Kontrakten betyr at Energi Teknikk har sikra seg arbeid til eit stykke inn i 2026.
– Ordreboka har blitt fylt og me har sikra oss trygge arbeidsplassar. Samtidig er det veldig mykje anna som skjer. Me har i tillegg nyleg fått beskjed om at me blir leverandør til to andre prosjekt, men i og med at avtalane endå ikkje er signert så er ikkje det offisielt heilt endå, fortel ein godt nøgd dagleg leiar.
Annonse
Historisk godt
Steinsvik fortel vidare at dei står i ein særs god posisjon om dagen, og at det for dei har vore eit historisk godt år.
– Det er kjekke tider og masse å gjera, samtidig som me har veldig flinke folk som står på. Det blir heilt klart lagt merke til, og me kan kanskje sei at me er blitt marknadsleiande i Norge. Det er ein hyggjeleg posisjon å vera i, men det er jo også noko som forpliktar. Me må levera på alt me tar på oss også, understrekar han.
– I fjor omsette me for 169 millionar, berre på denne nye leveransen passerer me 70 millionar. Driftsresultatet i fjor var på 14 millionar, med eit endeleg årsresultat på 12,6 millionar, så det er ingen tvil om at dette har vore eit historisk godt år for oss. Det syner også at det arbeidet me legg ned og innsatsen me investerer i over tid, gjev fine resultat. Det er ein bransje med tøffe marginar og beinhard konkurranse, men det er to ting som er desidert viktigast for Energi Teknikk; Teknologien vår og kompetansen som dei tilsette sit på. Me har utruleg dyktige folk, avsluttar Steinsvik.
