Landa i Rosendal grunna tekniske problem

I 00.30-tida natt til laurdag vart «halve» Rosendal vekt av eit helikopter som gjekk inn for landing på Rosendal stadion. Det viste seg å vera eit SAR Queen-helikopter. Helikopteret stod i Rosendal til 13-tida laurdag. Då letta det igjen, men vart hengande ei god stund over fotballbanen, før det til slutt sette kursen sørover.

– Det kom frå eit redningsoppdrag, men fekk tekniske problem, og valte å landa i Rosendal og vera der til dagsljoset kom, fortel Siv Namork, redningsleiar hjå Hovudredningssentralen til Grenda. Ho legg til at helikopteret hadde delteke på eit søk i Øystese.

Laurdag fekk helikopteret godkjenning til å returnera til basen på Sola, der teknikkarar skal kikka nærare på det.