Landa draumejobb
– No er eg glad, takksam, nysgjerrig og spent.
Publisert
Sist oppdatert
Det kan høyrast ut som at Anders Daidalos Dahle (44) vart spurt om kva han følte no, når det vart kjent at han blir dagleg leiar for Kvinnherad Arena frå 1. august.
Det blei han altså ikkje spurt om, men den spontane kommentaren til jobb-gratulasjonen vitnar om at dette er ein jobb han ser fram til å tre inn i.
Annonse
Stillinga som dagleg leiar for Kvinnherad Arena er toårig, og fram til bygget står klart ved årsskiftet, vil han jobbe med å planlegge den framtidige drifta frå rådhuset i Rosendal.
Viktig å etablere eigarskap
– Det er ein stor moglegheit som har opna seg for meg no. Dei to hovudinteressene mine er jo kultur og idrett, så eg kan ikkje be om noko meir når dei lyser etter nokon som kan leia ein arena der det blir satsa på nettopp desse to. Det står fram som draumejobben, medgir han.
– Men dette er ei ny satsing som ikkje er heilt definert. Vil det bli lagt føringar for det storstova skal fyllast med, eller får du frie tøylar?
Annonse
– Det er eit godt spørsmål som eg òg stiller meg sjølv. Først må iallfall den ordinære drifta setjast, der ein når ut til barnehagar, skular og idrettslag. Men det er sjølvsagt eit ønskje å gjera dette til ein samlingsplass for alle i heile kommunen, der alle kjenner seg velkommen og som flest mogleg får eigarskap til, seier han vidare.
Skal jakta storstove-potensialet
Dahle håpar det blir engasjement rundt arenaen og at folk kastar seg med for å skape innhaldet som kan bli med på å utnytta det potensialet som finst i denne.
– Det er eit unikt bygg som det har tatt både tid og krefter å byggja, og me må klara å forvalte det slik at mest mogleg av potensialet blir utnytta, både innan kultur og idrett. Vidare trur eg det blir viktig å legga best mogleg til rette for at det lokale og regionale næringslivet kan vera interesserte i å bruka det, likeins fagmiljø. Det er mange tema som kan vera utgangspunkt for ulike hendingar her, som til dømes det grøne skiftet. Det er eit stort bygg, og me må finna ut korleis me får henta ut den høgast moglege nytteverdien.
Ein av planane han har er å reise rundt på synfaring til andre liknande arenaer for å sjå korleis dei tek bygget i bruk, og hausta frå andre sine erfaringar. Likeins blir det nyttig å finne ut kva interesser som rører seg i kommunen og regionen, og der i frå å definere eit formål med bygget.
– Eg skal jakta etter Kvinnherad Arena sitt verkelege potensiale, slår han poetisk fast.
Annonse
Lovar å lytta og utfordra
– Skal du sose med dette åleine, eller får du eit lag med deg?
– I starten har eg jo ikkje noko kontor sidan bygget ikkje står klart, så eg vil sitja på rådhuset, vonleg rundt eit bord med folk eg kan kasta ball med. Der har eg politikarane og mange andre som er engasjert i dette, og kan høyre kva dei ønskjer med bygget. Samstundes vil eg sjølvsagt utfordra dei med mine eigne tankar og idear, forsikrar han.
Men sjølv om dette blir lagt fram som ein draumejobb, er det også ei bakside av medaljen for 44-åringen.
– Den tunge sida med dette er at eg må tre frå dei herlege ungane og kollegaene eg har hatt på Halsnøy skule dei siste åra. Eg har verkeleg blitt tatt godt i mot der og eg har opplevd ein enorm tillit, noko som ikkje er ei sjølvfølgje. Så å gå frå det, til ein jobb der eg nesten ikkje har eit kollegium, kan bli ei utfordring, medgir Dahle vidare, før han understrekar at det blir kjekt å invitera skular som ligg utanføre Husnes til å bidra til å skapa aktivitet i hallen.
– Min store, våte draum
Annonse
Dahle har, i lag med resten av Festidalen-styret, nettopp sett Festidalen 2022 vel i hamn då nyhenda om hans komande stilling som dagleg leiar er blitt kjend. Spørsmålet må jo stillast:
– Kan me venta oss nokre store konsertar i den nye storstova?
– No er denne stillinga toårig, og først og fremst må den ordinære drifta på plass. Men eg må jo innrømma at konsertar er min store, våte draum, så det håpar eg absolutt.
