Laggull til bogeskyttarklubben - Terje Bakke norgesmeister individuelt
Seks skyttarar frå Kvinnherad Bogeskyttarklubb deltok då NM vart arrangert på Land denne helga, og som vanleg reiste dei ikkje tomhendte heim.
Publisert
Laurdag var det innleiande skyting, i tillegg til lagfinalar. Ein har snakka om det i fleire år at det skulle vært kjekt å tatt heim laggullet til Kvinnherad. Og etter fleire år med både sølv og bronse skulle det endeleg lukkast denne gongen. Tremannslaget som bestod av Frank Johnsen, Terje Bakke og Atle Helland skaut godt heile dagen og det var såleis ekstra stas å kapra laggullet, det betyr litt ekstra for klubben.
Søndag var det eliminasjonsrunde og finaleskyting. Terje Bakke og Atle Helland var dei to frå Kvinnherad som kvalifiserte seg der.
Annonse
Bakke låg på andreplass etter kvalifiseringa, medan Helland låg på fjerdeplass. Men det skulle visa seg at dei klatra på resultatlista, og begge skaut seg fram til gullfinale.
– Terje vant sin gullfinale klart, og kunne såleis titulera seg som norgesmeister. Han fekk også forbundet sin pokal, som i år vart delt ut i hans klasse (tradisjonell boge utan sikte, red. merk), opplyser Atle Helland.
Helland tapte sin finale med tre poeng, og måtte ta til takke med sølvmedalje. Frank Johnsen blei nr. 9 i tradisjonell-klassen, Hans Einar Holmedal nr. 13 , Kjersti Ytrehus nr. 12 i dameklassen , medan Hendrik Rytberg vart nr 5 i bogejegerklassen.
