Lagar strategi for Armen til Bergen og Poll til Poll-tunellen
Fylkesutvalet fekk førre måndag opp ei sak om «Organisering av prosessen med KVU E134 Arm til Bergen». Poll til Poll-tunellen er ein sentral del av dette prosjektet.
Publisert
Sist oppdatert
Som kjent vedtok Samferdselsdepartementet for nokre månader sidan den nordlege traseen for Armen til Bergen, det vil seia Jøsendal via Odda og Mauranger, og Norheimsund til Trengereid ved E16. Konseptet legg opp til trinnvis utbygging.
I haust har departementet gitt Statens vegvesen oppdrag om å starta eit utgreiingsarbeid saman med Vestland fylkeskommune. Dette med sikte på å få på plass ein utviklingsstrategi med framlegg til prioritering og finansiering av dei viktigaste prosjekta på strekninga. Fyrste byggjetrinn omfattar Oddadalen, tunell mellom Austrepollen og Nordrepollen, og tunell forbi Tokagjelet, samt forsterka ferjetilbod over Hardangerfjorden.
Annonse
Tett dialog
«Fylkesdirektøren er kjent med at Statens vegvesen no utarbeider eit styringsdokument for prosessen. Det blir lagt opp til ei styringsgruppe som leiast av Statens vegvesen. Førebels er ikkje nærare mandat og framdriftsplan avklart», stod det i sakspapira.
Det vert elles opplyst at for reguleringsplanane for Steinsdalen-Eikedalen og Nordrepollen-Austrepollen vert det lagt opp til å levera planframlegg til 1. gangsbehandling i fyrste halvdel av 2025.
«Det er Statens vegvesen sitt ansvar å leie prosessen med KVU arm til Bergen. Fylkesdirektøren legg til grunn at arbeidet må skje i ein tett dialog med fylkeskommunen både på administrativt og politisk nivå. Fylkeskommunen har i dette arbeidet ansvar for å ivareta også kommunane sine interesser, og avvege ulike interesser mellom kommunane. Arbeidet vil krevje tett politisk dialog med kommunane», vart det opplyst.
Annonse
280 mill. kroner
Saka var berre til orientering, men Sigrid Brattabø Handegard (Sp) sette fram eit tilleggsforslag, som vart samrøystes vedteke. Der heiter det:
«Det er viktig med god dialog mellom mellom kommunane og fylkeskommunen for å ha ei framdrift som ivaretek vedtaka om Tokagjelet og Poll til Poll, slik det går fram i budsjett/økonomiplan 2025-2028. Fylkestinget er svært positive til at Statens vegvesen no startar opp arbeidet med å utarbeida ein utviklingsstrategi for E 134 Arm til Bergen».
I den nemnde økonomiplanen, som fleirtalspartia nett vart samde om, er det sett av 40 millionar kroner til Poll til Poll-tunellen i 2026, 70 mill. i 2027 og 170 mill. i 2028, i alt 280 millionar kroner.
