Laga til minnelund på Utåker

Kyrkjegardsarbeidarane Helge Furdal og Alf Jarle Langeland byrja prosjektet med minnelund på Utåker i førre veke, og er allereie ferdige med arbeidet.

– Vi brukte berre nokre dagar. Når vi fyrst byrjar, så hiv vi oss rundt, smiler Furdal.

Det manglar berre å henga opp skiltet det står «Minnelund» på.

Førre torsdag reiste karane inn til Sollesnes ved Jondal for å henta to store steinar, deriblant den eine som skulle til Utåker. Den største steinen vog kring 750 kilo og er 1,80 høg.

– Vi tykkjer det er greitt å bruka naturstein. For oss var det som ein godteributikk å vera i steinbrotet, for det låg flotte steinar overalt, humrar Helge Furdal.

Uskedalen neste

Tidlegare har Husnes, Rosendal og Halsnøy fått minnelundar. No flyttar kyrkjegardsarbeidarane seg til Uskedalen, der dei truleg startar opp komande måndag.

– Deretter tek vi det fortløpande. Tanken er at alle kyrkjene skal få. Slike minnelundar er jo litt i tida, mellom anna på grunn av prisen. Ei vanleg grav med gravstein kostar fort 40.000 kroner, medan ei urne ikkje krev så mykje meir enn eit skilt. Dessutan bur folk over heile landet, og det å stella ei grav er gjerne ikkje så lett som det var tidlegare. I tillegg passar vi på at det er fint rundt minnelunden, og tek vekk visne blomar og slikt. Ei grav er mykje meir privat, og noko vi ikkje rører, oppsummerer Helge Furdal.