– Lag klare avtalar med dine unge håpefulle

Vi går etter helga over i mai månad og fleire ungdomsarrangement står på trappene. I den anledning oppmodar politiet i Kvinnherad foreldre der ute til å laga tydelege avtalar med borna sine.

– Vi går inn i ei tid der mange ungdommar vil vera meir ute på ei rekkje ulike arrangement og sosiale tilstellingar. Noko som er vel og bra. Men vi ynskjer å oppmoda foreldra om å laga klare avtalar med sine unge håpefulle, spesielt når det kjem til køyring til og frå dei ulike arrangementa, seier politioverbetjent Sigurd Børve ved Kvinnherad lensmannskontor.

Han påpeikar også at det er mange som i desse dagar skal på fest for fyrste gong, og at det i den anledning kan vera lurt å ta ein prat med dei om korleis ein vil at ungdommen skal oppføra seg når ein er ute.