Låg arbeidsløyse i Sunnhordland

«I februar registrerte Nav 1 prosent heilt ledige i Sunnhordland. Det er ein nedgang på 56 heilt ledige personar sidan januar», står det i ei pressemelding ifrå NAV.

I januar var det registrert 373 heilt ledige personar, og i februar var talet 317. Det har ikkje vore så låge tal i årets to fyrste månader sidan 2008. Jamt over i fylket har arbeidsløysa gått ned med over 1300 personar sidan februar i fjor.

«Talet er mykje lågare enn kva tilfelle er for fylket for øvrig og landet elles - som ligg på respektive 1,8 og 1,9%. Tala ser vi i samanheng med høg aktivitet i det lokale næringslivet, og særlig industrien», seier Håvard Lægreid, leiar i NAV region Sunnhordland i pressemeldinga.

Samstundes registrerte NAV at det var 521 ledige stillingar i Sunnhordland i februar, 56 av desse i Kvinnherad. Av dei 56 er det 17 helserelaterte stillingar.

«Deler av den høge etterspurnaden er i relasjon til lærling- og sommarjobb. Det er viktig at ungdommen i regionen no er vakne i høve moglegheiter fram i tid. Samstundes kjenner vi til at fleire verksemder slit med å få tak i den rette kompetansen», skriv Lægreid vidare.

På tide å søka sommarjobb

Mange bedriftar er for tida på jakt etter folk, og i februar var det over 6000 ledige stillingar i Vestland. På arbeidsplassen.no, som er NAV sin plattform for jobbsøkjarar, ligg det no over 1400 ledige sommarjobbar.

– Arbeidsgjevarane er tidleg ute med å annonsera stillingane, og dei som ikkje allereie har fått jobb har ein god sjanse no. Det er særleg mange ledige stillingar i helse- og omsorgssektoren som kan gje verdifull arbeidserfaring, seier direktør Anne Kverneland Bogsnes i NAV Vestland i pressemeldinga.

Ho oppmodar til å både følgja med på utlyste stillingar, men òg kontakta bedrifter ein har lyst til å jobba for direkte.