Låg arbeidsløyse i Kvinnherad
I følgje tala frå september er arbeidsløysa i Sunnhordland no på same nivå som før koronapandemien. – Dette må seiast å vera ein milepæl, seier Håvard Lægreid, leiar i NAV region Sunnhordland.
Publisert
Sist oppdatert
I ei pressemelding frå NAV Sunnhordland vert det vidare hevda at det er full fart i arbeidsmarknaden, med gjenopninga av samfunnet og mange ledige stillingar. I september var det registrert 238 ledige stillingar hos NAV Sunnhordland, og til no i år har det vore utlyst 307 stillingar kvar månad.
«Flest stillingar denne månaden var det innan helse og omsorg (72), ingeniør og IKT-fag (27), undervisning (21), bygg og anlegg (20) og industri (18).» samanfattar NAV Sunnhordland.
Annonse
Den 1. oktober var det registrert 35 ledige stillingar i Kvinnherad på NAV sine sider, og det ligg såleis til rette for at arbeidsløysa i kommunen kan halda fram å gå ned i den komande månaden.
– Fleire av dei ledige stillingane har krav om fagbrev eller høgare utdanning. For jobbsøkjarar vil kompetanse vera eit nøkkelord. For NAV er det ei viktig prioritering at me kvalifiserer folk til dei ledige jobbane, understrekar Lægreid.
Vonar positive følgjer av gjenopning
Det vert vidare konkludert med at arbeidsmarknaden i Sunnhordland har kome relativt godt gjennom pandemien.
Annonse
– Gjenopninga kan gi ein ekstra positiv effekt, som til dømes høgare aktivitet innan bransjar som transport, servering og tenesteyting, seier Lægreid vidare i pressemeldinga.
Og den lågaste arbeidsløysa i Sunnhordland finn ein i Kvinnherad og Sveio, som begge ligg på 1,4%. Snittet for heile Sunnhordland er på 1,9%, for Vestland ligg den på 2,3% og for heile landet er snittet 2,4%.
Desse tala fortel om kor mange personar som er registrert som heilt ledige.
