Lærerikt storkurs for 4H

Med leiarar på skulen talde besøket 65, der 50 av dei var 4H-ungdom. Frå fredag ettermiddag til søndag formiddag var dei samla med ungdomsskulen som overnattingsstad og Rosendal Samfunnshus som matsal.

– Me har fått veldig gode tilbakemeldingar frå både vaksne og deltakarane, seier Venke Ølvestveit etter at storkurset til Lauvsprett 4H er vel i hamn.

Smedkurs

Ølvestveit er klubbrådgjevar og mor til ein kvartett noverande og tidlegare 4H-arar.

– Gode kurs, og både deltakarar og kurshaldarar var nøgde, referer ho.

Lauvsprett baud på mange lærerike kurs, som deltakarane hadde meldt seg på før helga tok til.

– Me hadde ei gruppe som var på klatring i Uskedalen, der dei fekk instruksjon av Chris Fossli. Samtidig med at 4H-arane var der, køyrte dei instruktøropplæring for sine eigne. 4H-arane fekk Topptaukort og klatreklubben fekk utdanna eigne instruktørar. Våre folk fekk veldig god oppfølging av dei, skryt Ølvestveit.

Det mest unike kurset var kanskje smedkurset.

– Kurshaldaren er ein tidlegare 4H-ar som har flytta frå Nord-Trøndelag til Odda for å gå på smedlinja der inne. Jarle Fossheim stilte si smie til disposisjon for oss, og han var overlukkeleg over at nokon kunne ha bruk for smia, fortel Venke Ølvestveit etter at eit knippe ungdommar hadde fått tatt seg ut på raudglødande metall.

Kajakk og volleyball

Perlo Kajakklubb ved Leif G. Hovden tok seg av kajakkurset.

– Der fekk dei våttkort, grunnkurset som gjev kunnskap om korleis du skal oppføra deg i ein kajakk, kajakkekvivalenten til Topptaukortet, forklarer klubbrådgjevaren.

Sonen hennar, Hjalmar Ølvestveit, hadde ein gjeng med seg på paintball i Åkra.

– Dei var ute, utan at nokon klaga av den grunn, trass i ausande regn, påpeikar Venke.

Det mest kortreiste av kursa var volleyballen, som Amund Furdal hadde ansvaret for i gymsalen i Rosendal. Der var fleire av dei lokale deltakarane og fekk kunnig opplæring.

Kniv- og motorsagkunstnar Kjell Musland lærte vekk nokon av sine beste triks til dei som var interesserte i trearbeid. Flettemamma lærte tilsvarande vekk hårfine triks.

– Omvikdalen Bygdekvinnelag fekk skryt for god mat og god gjennomføring. Me er veldig nøgde med lokala, samspelet mellom samfunnshus og ungdomskule var ideelt for vårt bruk, rosar Ølvestveit.

Storkurset er berre noko av det Lauvsprett 4H har for seg denne hausten. 20. oktober byr dei på den årlege haustfesten.

– Med 60 medlemmer i klubben, så det blir fullt i Dalheim. Me må truleg avgrensa kor mange familiemedlemmer kvar einskild får ha med seg på festen, sluttar Ølvestveit.