Laaang debatt om vindkraft – sendte sterke signal

Ordførar Vegard Bjørnevik (H) tok sjølv ordet fyrst for å orientera om prosessen rundt strategiplanen og kommunen/eigarskapsutvalet si rolle. Han fortalde at eigarskapsutvalet, beståande av han sjølv, varaordførar Thea Vaage (Ap) og Silje Nordtveit Olsen (SV), har hatt fleire møte med Kvinnherad Energi.

– Eigarskapsutvalet har vore tydeleg på haldninga til Kommunestyret når det gjeld vindkraft og utbygging av verna vassdrag med meir, men vi har òg vore tydeleg på at vi ikkje vil avgrensa selskapet i deira utforming av strategiplanen. Vi meiner dei har eit kompetent styre som veit best sjølv korleis dei vil utvikla selskapet, sa Bjørnevik.

Nøgde – men spente på om strategiplanen vert endra

Peikefinger

Han hadde også ein peikefinger å koma med.

– Eg har i denne prosessen observert at det har vore eit stort engasjement, og eigarskapsutvalet har blitt tillagt meiningar vi ikkje kjenner oss igjen i. Eg forstår og aksepterer at enkelte interessegrupper har si rolle og sine sterke meiningar i slike saker, men eg må innrømma at eg blir overraska når representantar i Kommunestyret ikkje forstår roller og prosessar. Viss ikkje nokon forstår, eller synest ting er uklart, ver venleg å ta kontakt, sa han utan å nemna kven han tenkte på.

Bjørnevik hadde også notert seg påstandar i sosiale media om at kommunedirektøren har innstilt på vindkraft.

– Eg vil presisera éin ting; kommunedirektøren har inga meining i denne saka. Vi skal ikkje behandla strategiplanen til Kvinnherad Energi, det er det selskapet sjølv som gjer, avslutta ordføraren.

Han pådrog seg straks ein replikk frå Ove Lemicka (Frp).

– Kommunestyret behandlar strategiplanen til Kvinnherad Energi i dag, og vi kjem til å gjera vedtak. Punktum! Det er ikkje slik at det er opp til selskapet, slo han fast.

Sunt å vera ueinig

Thea Vaage (Ap) gjekk så på talarstolen for å gje sine vurderingar.

– Det er styret i Kvinnherad Energi som skal bestemma strategien, og det er vi i Kommunestyret som skal senda tydelege eigarsignal. Det er sunt å vera ueinig, men det blir ikkje eit godt miljø når ein ikkje kan vera ueinige utan å henga kvarandre ut i media, meldte ho.

Også den siste i eigarskapsutvalet, Silje Nordtveit Olsen, fekk sleppa til innleiingsvis.

– Vi i SV er opptekne av korrekte prosessar. Etter vår forståing er det styret som skal vedta denne planen, men det er viktig at vi kjem med eigarskapssignal i dag, sa ho, og understreka at eit samla kommunestyre har sagt nei til vindkraft.

Partikollega Wermund Vetrhus meinte strategiplanen var eit godt utarbeidd fagleg dokument, som omhandlar mange former for fornybar kraft.

– Om dei ikkje hadde gått inn på til dømes vindkraft og kjernekraft, så hadde det vore heilt openberre manglar i det som elles er eit godt fagleg dokument, analyserte han.

Feil å kritisera

Jarle Andresen (Sp) tykte det ville vera feil å kritisera styret i Kvinnherad Energi for at dei gjer jobben sin godt.

– Vi i kommunestyret burde vera litt forsiktige i måten vi adresserer og omtaler styret og vurderingane som blir gjort i Kvinnherad Energi med tanke på posisjonen vår ovanfor selskapet. Og vi kan alle vera einige eller ueinige om kva energitypar vi vil ha i Kvinnherad. Ei utgreiing er på ingen måte det same som at vi ynskjer å ha det, sa han, og la til at politikarane i dag har vetorett mot utbygging, sjølv om det kan endra seg i framtida.

– Eg vil mykje heller ha ei intern utgreiing før regjeringa kjem med ei ekstern. Det vil i verste fall kun gje oss kunnskap og argument for kvifor vi ikkje skal ha vindmøller i Kvinnherad den dagen vi blir utfordra frå høgare hald, la han til.

Jostein Rødland (INP) var svært tydeleg i sine signal.

– Dei skal ikkje bruka lønskroner på å utgreia vindkraft. Dei skal ikkje vera pådrivarar heller. Dei skal rett og slett halda seg vekke frå vindkraft, sa han.

Rødland og Lemicka la elles vekt på at Kommunestyret i den komande arealplanen bør utelukka alt areal i Kvinnherad frå vindkraft.

Innstilling og forslag

Innstillinga frå kommunedirektøren var på ti punkt:

1. Sikra effektiv og rasjonell drift av Hattebergsdalen kraftstasjon.

2. Gjennomføra simulering av Hattebergvassdraget for å optimalisera kraftproduksjonen.

3. Vurdera mogeleg minikraftproduksjon i Hattebergsvassdraget utan å utfordra vernestatus i området.

4. Gå i dialog med Vestland fylkeskommune for mogeleg kjøp av Valen Kraftverk.

5. Gjennomføra Onarheim Kraftverk saman med SKL.

6. Vera ein aktiv samarbeidspartnar inn mot SKL for å skaffa ny småkraftproduksjon i kommunen.

7. Gjennomføra ei kartlegging av potensiale for fornybar energi i kommunen.

8. Vera ein pådrivar for å få til ny fornybar kraftproduksjon i kommunen.

9. Kan ta ei aktiv rolle i Grøn Næringspark Husnes.

10. Halda fram som ein aktiv eigar av Kvinnherad Breiband.

Tidleg vart det presentert fleire endringsforslag. SV ville fjerna punkt 5 om Onarheim kraftverk, og presisera i punkt 7 og 8 at ein ikkje skal kartleggja potensialet for vindkraft eller kjernekraft, og heller ikkje vera pådrivar for desse energiformene.

Ove Lemicka ville ha med punkt 5, men endra 7 og 8. Rett nok markerte han motstand berre mot vindkraft, ikkje kjernekraft.

Lemicka og Frp hadde dessutan to tilleggsforslag. Eitt om å greia ut datalagringssenter i fjellhallane i Matre, og eit om å laga ein plan for mogleg utbygging av solkraft på kommunale bygningar.

Vedtaket

Etter ein lang debatt og eit temmeleg drygt gruppeleiarmøte, la Per Harald Havnen Löfgren Johansen (Ap) fram forslaget som vart samrøystes vedteke. Det lyder enkelt og greitt: «Kvinnherad kommunestyre tek Kvinnherad Energi AS sin strategiplan til vitande. Kvinnherad kommunestyre vil samstundes minna om gjeldande kommunestyrevedtak om at det ikkje skal byggjast ut vindkraft i Kvinnherad kommune».

Det betyr at forslaga frå kommunedirektøren (0 for), Lemicka (7 for) og Vetrhus (4 for) falt. Lemicka sitt forslag om datalagring leid same skjebne (8 for), men ideen om solkraft vart derimot vedteken med 25 mot 9 røyster.