– La oss stå saman og dra lasset same veg. Ikkje med ulikskapar og diskriminering, men med kunnskap, erfaringar, lov og avtaleverk.

Slik opna hovudtillitsvald Line Haugland i Fagforbundet sin tale til formannskapet torsdag ettermiddag.

Politikarane var samla for å høyra begge partane sitt syn i konflikten som har oppstått mellom kommuneleiinga og Fagforbundet. Ein konflikt som dreiar seg om turnusane for helsefagarbeidarane ved Husnestunet. Møtet kom til å vara i nesten tre timar.

Haugland heldt fram med å referera frå Arbeidsmiljølova og hovudtariffavtalen.

– La oss vera einige om at det å ha ein god arbeidstidsplan, der alle blir ivaretatt på best mogleg måte, er absolutt det beste botemiddel mot sjukefråvær, mot diskriminering, mot sosial dumping og utnytting av enkeltindivid, sa ho.

Ho understreka at Fagforbundet ynskjer å vera med på å finna dei gode løysingane for at drifta i kommunen skal bli berekraftig.

– Men vi gjer ikkje det ved å forfordela ei yrkesgruppe føre ei anna, vi gjer det ved gjensidig respekt og forståing, meinte Haugland.

Spara smart

Ho sa vidare at Fagforbundet er overtydd om at ein saman kan gjera kommunen til ein føregangskommune på fleire område. Hennar oppmoding var å byrja med normalarbeidstid på 7,5 timar, slik at fleire kan få høgare stillingsprosent.

– I dag har dei som har låg stillingsprosent gjennomsnittleg fleire vakter enn ein i 100%. Det gjer det vanskeleg å jobba seg opp/samla timar til å få ei lønn å leva av. Administrasjonen sitt pålegg om å la tilsette som ikkje er høgskuleutdanna jobba kortare vakter og ha fleire arbeidsdagar, vil etter vårt syn føra til ei urettvis handsaming av tilsette, som både diskriminerer yrkesgrupper og sei dei opp mot einannan, hevda Line Haugland.

Oppmoding til politikarane

Ho runda av med ei oppmoding til politikarane om å visa at dei ikkje er samde i dei som seier til våre nyutdanna fagarbeidarar at «det er ikkje fagarbeidarar kommunen treng, det er sjukepleiarar, så dei bør setja seg på skulebenken igjen».

– Vi meiner alle har lik verdi, eller som ei så fint sa: «Utan dei som vaskar får ikkje direktøren gjort jobben sin». Vi har alle same verdi sjølv om vi ikkje har lik lønn. Vi trur på ei rettvis behandling av denne saka, vi trur at om vi får byrja med 7,5 timars normalarbeidstid vil ein ikkje berre styrka bemanninga, men også heva status på helseyrket slik at det er hender til framtidas pasientar også, sa Haugland.

– Difor bed vi dykk som politikarar om å gje tydlege signal om kva de meiner er viktig; likebehandling eller forfordeling? avslutta ho.