La fram appell frå Herde Kompositt til fiskeriministeren

Onsdag kom fiskeriminister Marianne Sivertsen Næss til Rosendal, saman med Linda Merkesdal, stortingsrepresentant for Hordaland Ap og medlem i Energi- og Miljøkomiteen. Dei er på jakt etter meir kunnskap om berekraftig teknologi innan havbruksnæringa, og får vitja både Salmon Eye og det lukka Watermoon-anlegget til Eide Fjordbruk.

– Dette må no vera ein av dei vakraste plassane eg har vore, utbryt fiskeriministeren medan ho let blikket kvila på snødekte fjell.

– Du må berre venta til me kjem ut på sjøen, for då blir det fint, kjem det frå Sondre Eide frå Eide Fjordbruk, som er ein av guidane på turen.

Miljøpåverknaden

Fiskeridepartementet jobbar no med ei havbruksmelding som skal staka ut kursen vidare for næringa. Ministeren ser for seg at oppdrettsnæringa skal halda fram med å veksa, men vil dreia utviklinga i ei litt anna retning.

– Me har ein del utfordringar me må løysa, og dagens system legg ikkje til rette til det på ein god nok måte. Det er for høg dødelegheit, for låg dyrevelferd, og me er nøydde til å få ned miljøpåverknaden, seier Næss til Grenda.

Ho vil jobba grundig med innhenting av innspel, og danna seg eit godt bilete av situasjonen og moglege løysingar før havbruksmeldinga ligg klar.

– Me har ei næring som har vakse fort på få år. For at me skal lukkast med at næringa skal halda fram med å veksa, må det skje på ein berekraftig måte. Så då går me gjennom alt av innspel. Eg trur på det å koma seg ut og sjå og høyra og lukta og vera til stades. Det er utruleg viktig for den jobben eg skal gjera, smiler ministeren.

Politiske prosessar har det med å ta tid, og det kunne også Marianne Sivertsen Næss stadfesta.

– Me har hatt innspelsmøte, køyrt meldinga gjennom eit havbruksutval og ein NOU, så det er gjort mykje. Men eg vil ha med meg alt, reisa rundt og gå gjennom alt av løysingar, heilt til me har levert meldinga, forklarar ho.

Utolmodige aktørar

– Me ligg i vass-skorpa og ventar, seier Reidar Solheim til Grenda.

Solheim er tillitsvalt i Herde Kompositt, no eigd av Ovum. Han var også med på båtturen med fiskeriministeren, og hadde ein klar agenda for dagen.

– Har du høyrt om Egget?, spør han fiskeriministeren, noko ho kan stadfesta.

– Me ventar jo på at det skal koma ei havbruksmelding med litt betre ordningar, sånn at me kan produsera nye egg på Herde, og få oppdrettarane til å bestilla lukka anlegg. Det er ein svært berekraftig teknologi, seier Solheim til Næss, og gjev ho eit forklarande skriv.

– Dette skal eg absolutt ta med meg vidare, tusen takk, svarar ministeren.

Til Grenda forklarar Reidar Solheim bakgrunnen for skrivet han leverer til Marianne Sivertsen Næss.

– Det gjeld Miljøfleksibilitetsordninga som ho sende på høyring i slutten av desember. Me hadde store forhåpningar til at denne skulle løysa nokon av problema våre. Me lagar lukka oppdrettsanlegg. Dei er sjøbaserte, men heilt rømmingsfrie og lusefrie, og det kjem ikkje avfall ut i fjorden, seier han.

I Miljøfleksibilitetsordninga vert det lagt fram forslag til økonomisk kompensasjon for landbaserte oppdrettsanlegg. Dei skal i følgje ordninga kunna få gratis løyve, noko som elles kan kosta 200 millionar kroner. I tillegg får dei ein kraftig skattereduksjon. Slike økonomiske kompensasjonar er ikkje føreslege for lukka anlegg som Egget.

– Det er veldig synd. Byggjer ein på land, krev det store område, og ein må sprenga ut knausar ved fjordane våre og gjera stor skade på naturen for å få plass, seier Reidar Solheim.

Berre få det gjort

Forslaget frå fiskeriministeren har fått kritiske spørsmål om dette også tidlegare, sidan slike ordningar i utgangspunktet skal vera teknologinøytrale. Solheim synest i tillegg at handsaminga av denne ordninga tek altfor lang tid.

– No er det ikkje høyringsfrist før i mars, og så kjem det til å gå endå fleire månader før det ligg ferdig. Me hadde eigentleg håpa å ha nokon svar alt første januar. Det sit kundar der ute no og ventar på denne ordninga, sånn at dei kan vita kva som er mest økonomisk å investera i, forklarar han.

Dette har sjølvsagt store konsekvensar for bedrifta i Ølve og deira tilsette, noko Solheim formidlar tydeleg til dei besøkande i Rosendal onsdag. Til Grenda stiller han eit retorisk spørsmål:

– Eit einstemmig Storting har bestilt berekraftige ordningar frå Fiskeriministeren. Kvifor venta? Kan dei ikkje berre få det på plass?

Grenda stiller Marianne Sivertsen Næss det same spørsmålet, og ho har ikkje noko problem med å svara.

– Det er ikkje lenge sidan me annonserte at me skulle koma med ei havbruksmelding. Me har blitt bedne om å lytta til næringa, og det tek tid. Det er ei stor næring langs heile kysten, med ulike teknologiar på ulike lokalitetar. Målsetjinga vår er at det me presenterer faktisk svarar på dei utfordringane som næringa har. At me treff. Og så skal me levera ganske snart, smiler fiskeriministeren.