La barn leve i fred

I år går årets innsamling til Redd Barna og deira arbeid med å hjelpa barn som er råka av krig og konflikt. Meir spesifikt går pengane til prosjekter i Ukraina, Syria, Bangladesh, Sør-Sudan, DR Kongo og Noreg.

Redd Barna vil bruka midlane til mellom anna å

•Gje barn moglegheita til å gå på skulen

•Føra saman barn med familien dei har kome bort frå

•Støtta tidlegare barnesoldatar

•Trygga leikeområde der barn kan utfolda seg

•Hjelpa barn til å handtera vonde opplevingar

•Gi barn som har flykta til Noreg ein aktiv fritid

Treng fleire frivillige

Det er om lag 350 stykke som er med på årets TV-aksjon i Kvinnherad. Mellom anna gruppa «Innsats for andre» på Husnes ungdomsskule er klare for å hjelpa til neste sundag. Likevel treng aksjonsgruppa fleire hjelparar.

– Vi manglar rodeleiarar i Omvikdalen, Åkra og Valen, og vi treng også fleire bøsse-berarar, seier leiar for Kvinnherad Frivilligsentral Veronica T. Thorsen.

Ho fortel at ein kan melda seg på på nettsidene til TV-aksjonen eller direkte til aksjonsgruppa. Dei som melder seg blir kontakta i neste veke.

– Dette er jo Noregs største dugnad og er sjølvsagt eit stort arbeid å organisera, men det er lika kjekt kvart år, og vi håpar at fleire har lyst til å hjelpa, seier Thorsen og legg til;

– Vi håpar at folk tek godt imot dei som kjem på døra. Hugs at det er i god hensikt at folk bankar på.

Barnas dag

Tidlegare år har det pleidd å vera kulturfest fredagen før TV-aksjonen i festsalen på Husnes. I år arrangerer aksjonsgruppa eit anna type arrangement.

– Sidan midlane går til Redd Barna sin innsats for krigsramma barn og at dei skal få ha ein aktiv fritid, arrangerer vi «Barnas dag» i Kvinnherad Arena fredag 20. oktober, fortel Thorsen.

Der vil det vera aktivitetar som rulleskøytedisko og boblefotball, og turnhallen kjem til å vera open. I tillegg blir det open kiosk, kor inntektene går til TV-aksjonen.

e