Kyrkjesundag i Åkra: Konsert med nynorsk rockepoet
1. pinsedag er det klart for det årvisse kyrkjesundags-arrangementet i Åkra. I samband med dette inviterer Åkra bygdalag og Åkra sokneråd til konsert.
Publisert
«I år er me så heldige å få vitjing av den kritikarroste artisten, poeten og låtskrivaren Tom Roger Aadland, opphavleg frå Vikebygd i Vindafjord. Han har gitt ut mange album til strålande kritikkar, aller mest kjend er han nok for sine eminente gjendiktingar av Bob Dylan sine tekstar til nynorsk», skriv arrangørane i ei pressemelding.
Kritikarrost og ettertrakta
Annonse
5. mars i fjor gav Aadland ut sitt førebels siste album, «Motgift», til strålande kritikkar. Mellom anna meinte Klassekampen at albumet var det beste artisten nokon sinne hadde gjort. Det siste året har han elles skrive låtar for Hellbillies sitt siste album og hatt ein travel konserthaust.
I byrjinga av mai i år kom han ut med ein ny singel, «Broen heter kjærlighet». Låta skreiv han heilt attende i 1982, då han spelte i rockebandet Akutt, kor Grethe Svensen var vokalist. Dei to artistane har framført songen fleire gongar tidlegare, men først no har dei gått ilag for å spela den inn.
Søndag 5 juni kan ein bli betre kjend med det musikalske landskapet til Aadland, då han held konsert i Åkra kyrkje. Arrangøren meiner at dette er noko ein ikkje vil gå glipp av:
«Og har du høve til å ta turen, er det vel verdt det!» helsar dei.
