Kyrkjeklokkene ringer valet inn
Det er ikkje berre kommunestyre- og fylkestingvalet som står på trappene. Tradisjonen tru vert også kyrkjevalet arrangert samtidig, og i år kan du stemma elektronisk.
Sjølve kyrkjevalet vert halde samtidig med kommunevalet 10. og 11. september, men før det kan ein førehandsrøyste. Det kan ein gjere på to ulike måtar, digitalt eller på papir i fysiske lokale.
Mellom 15. august og 7. september kan ein to gonger i veka førehandsrøyste ved to faste stader; kyrkjekontoret på Valen og på Rådhuset i Rosendal. Utanom dette har ein høve til å førehandsrøyste ved nokre utvalde stader kringom kommunen, blant anna etter enkelte gudstenester i Ølve kyrkje, Kvinnherad kyrkje, Varaldsøy kyrkje, Hatlestrand kyrkje og Eid kyrkje.
Annonse
Røysterett
Dersom ein heller ynskjer å stemma frå heime i godstolen, kan ein i år også stemma digitalt. Alt ein treng då er ein dings med skjerm som gjev tilgang til internett, i tillegg til sin eigen bank-id. Dette kan ein gjere i perioden mellom 10. august og 6. september.
Til skilnad frå kommuneval og stortingsval treng ein ikkje å vera 18 år for å kunne stemma ved kyrkjevalet. Dersom du fyller 15 år i år har du røysterett.
